آآآآآآآآآآآه يا قلبــــي يانـــي

10/08/2009

آآآآآآآآآآآه يا قلبــــي يانـــي

الموضوع ده سببه واحد في كليه إعلام .. في سنه 4 جالي

وقالي

يا محمد انا مخنووووق ومضايق قلبي حزيين مع اني بعمل كل حاجه تخليني سعيد ..

قالي كل ما تتوقعه مافيش بنت عجبتني الا مشيت معاها وخرجت معاها وعملت كل حاجه .. مفيش رحله الا لازم اروحها .. مفيش شريط الا ما اشتريه ..

جربت شرب وجربت كل حاجه ولسا قلبي حزين .. جربت اسيب البنات واعيش حياتي واشتري لبس وابقا استايل اخر حاجه .. بردو مش سعيد .

كليتي فيها اجمل بنات في جامعه القاهره كلها .. واكتر جامعه استايل ...

انا مش عارف جربت كل حاجه ولحد دلوقتي مش عارف أوصل للسعاده ..

فكان الحديث كالاتي .. وكان الحوار معاه كالاتي :

دلوقتي انا واحد سمعت ان في جهاز جديد إسمه كمبيوتر وكل الناس بتشتريه وكل الناس فرحانه بيه وكل الناس بتقول ده تقدم ومفيد .... إلخ

روحت اشتريت كمبيوتر والرجل اعطاني معاه كيببورد وماوس وسماعات وكل حاجه ..

وبعد ما روحت البيت .. عايز بقا تشغل الجهاز الي انت دافع فيه دم قلبك ..

روحت جمعت العيال وأم العيال وحطيت الجهاز في الفيشه وعملت الاتي :

ورحت ماسك السماعات وحطيتها عند ودني .. ومسكت الماوس وحطيتها عند فمي وجيبت الكيب بورد وطلبت رقم تليفون جوز خالتي عشان اتصل بيه وأعمل صلة رحم .. إيه ده !!!

كل لما اطلب الرقم علي الكيب بورد مفيش حراره .. والعيال عمالين ينظروا ليه ..

والواد الصغير يقولي يابابا مش يمكن الحراره لسا ماجتش ؟

والتاني يقولي يمكن مدفعناش الفاتوره ..

والتالت مش يمكن جوز خالتي معندوش كمبيوتر .. !!!

فمراتك قالتلك يمكن يابو العيال الجهاز ده مش بتاع اتصال بحد ..

قلت ليها ازاي يا أم العيال ؟ ده كل الناس بتشكر فيه ازاي ميكنش فيه اني اتصل بحد ؟

قالتلك انا عارفه بتاع ايه الجهاز ده هقولك استنا وراحت سابتك ودخلت المطبخ ورجعت وفي ايدها .. حله فيها مياه

وقالتلك وسع ياخويا

وراحت داخلت علي الكيسا بتاعة الجهاز وفتحت المسامير ووسعت الاسلاك .. وقلبت الكيسا علي جنبها وراحت حطت الحله في الكيسا .. وراحت داست علي زرار السي دي روم ..

علي اساس ان الجهاز يشتغل ..

وبعد عشر دقايق جايه تمسك الحله لقيتها زي ما هي ..

قلتلها كتك نيله الحله زي ما هي ولا سخنت ولا بردت ..

هو في ايه ؟؟

وبات البيت يومها في غم وهم ؟؟ وقالوا نكمل بكرة ..

ليه البيت بات في غم وهم ؟؟

لانه معاه شيء كل الناس بتكلم عليه وفرحانه بيه ومستمعه بيه وهو مش سعيد ولا فرحان بيه وحاسس انه شيء تفاهه ملوش لازمه حاسس انه اضحك عليه ؟؟

طيب لو حب صاحبنا ده يعرف ايه فايدة الكمبيوتر ؟؟

واحد قاله عشان تعرف فايدة الكمبيوتر إفتح الكاتلوج .. ده بالعربي وسهل ..

فالرجل قال كاتلوج أيه لسا هقرا !!

انا هسأل واحد صاحبي ..

اتصل بواحد قاله : انا عن نفسي حاطه في الصاله في الشقه عندي وحاطط عليه طبق الفاكهه وشكله حلو أوي ..

قلت ليه هو ده استخدامه ؟؟ قالك بصراحه انا بستخدمه كده

واتصل بتاني قاله انا عن نفسي فتحت الكيسا وحاطط فيها شويه شباشب وشوية شرابات أهو بدل ما تتحط قدام باب الشقه ..

قلت ليه هو ده استخدامه ؟؟ قالك بصراحه انا بستخدمه كده

واتصلت بثالث :: قاله ان فتحت الكيسا لقيت حاجه كده حديد ..( يقصد الراما ) خلعتها وبقتح بيها علب التونه والبلوبيف ..

قلت ليه هو ده استخدامه ؟؟ قالك بصراحه انا بستخدمه كده

صاحبنا قال بسسسسسسس .. مش هيقولي البتاع ده بيشتغل ازاي .. غير صاحبي إسلام ده اذكي واحد في اصحابي ..

اتصل بيه وقاله انا مخنوووووق ومش عارف انام وعلي طول قلقان اشتريت جهاز كمبيوتر ودفعت فيه دم قلبي ومش عارف استخدمه وانا مخنوق جداً

فقال اسلام :ياعم متزعلش ولا حاجه انا جيبته وفرحان وعرفت كل حاجه بتشتغل فيه ازاي ..

انا شوفت سماعات فقلت اكيد بتطلع صوت .. وطالما صوت يبقي كاسيت فشغلت السماعات علي الكاسيت ..

وبالنسبه لشاشة ياسيدي انا شغلتها تلفزيون والباور سبلاي بشغل بيه كذا والماوس عملت بيها كذا ,,,, إلخ

قلت ليه هو ده استخدامه ؟؟ قالك بصراحه انا بستخدمه كده

طبعاً هو اسلام الاخير ده عمل فيها ذكي وفاكر نفسه فرحان .. لكنه مازال مش عارف يستخدم الكمبيوتر ويستفاد بكل الإفادة بتاعته ..

فصاحبنا عمل زي اسلام .. لكنه بردو حاسس ان الجهاز ليه فوائد أكتر من كده وأهم من كده .. فمازال به الهم والغم والحزن ..

--------

وفي لحظه من اللحظات جلس صاحبنا في بيته فوجد تحت السجادة في الصالون المدهب أبو 6.5 الالاف الي جابه من دمياط المهم لقى كتيب صغير .. ( كتالوج للجهاز )

كتب هذا الكالتلوج الرجل الي صنع هذا الجهاز ..

وضح فيه امكانيات هذا الجهاز ووضح فيها أهميه هذا الجهاز وطريقته استخدامه وطريقه تركيبه وفكه وتحديثه وحذر من أعمال خاطئه تضر الجهاز .

وظل صاحبنا طوال الليل .. يتبع تعليمات هذا الكتالوج حتى بدء في استخدام الجهاز وعرف انه بالجهاز ده يقدر يعرف الصين حصل فيها ايه دلوقتي .. يقدر يجيب نتيجه ابنه في الثانويه العامه .. يقدر يعرف كل شيء ويعمل كل .. والجهاز ده جعل ليه الكرة الأرضيه ككره الاسكواش .. صغيره يستطيع ان يعرف كل ما يجري حوله في العالم ..

انتهى المثل الطويل ..

أخي ربنا أعطاك قلب..

وقال لك في القران وعن طريق النبي صلي الله عليه وسلم ..

كيفية سعادة هذا القلب وايه الطريق والطريقه الي تقدر تعيش بيها في الدنيا وقلبك سعيد ..

انت بقا روحت ومعرفتش ايه طريقة استخدام القلب ... ورحت زي صاحبنا .. سألت فلان وقالك يابني الدنيا دي مفهاش غير البنات والحريم متع نفسك وعيشلك يومين ..
ومفيش أحلى من الحريم في الدنيا ..

انت روحت مشيت مع فلان وسهرت مع علانه ..

وفعلت الفاحشه مع فلانه وفي الاخر بترجع تقول مش سعيد ..

فسألت صاحبك التاني .. قلت ليه انا مخنوق ومش عارف اعمل ايه ..

قالك مفيش غير قاعده عربي في شقة الواد فلان .. بيجيب حتتين الحشيش من طريق الفيوم .. وبنقعد بنعمل دماغ عاليه متحسش بالدنيا تحس ان الدنيا عامله زي البالونه .. تجيبها يمين تيجي يمين تجيبها شمال تيجي شمال ..

وبعد كده انت لسا مخنوق .. ( تقولي لاء مكنتش مخنوق انا كنت ساعتها فرحان .. )

طيب كنت فرحان ليه بالظبط كانك قعدت مع واحد وزغزغك ورحت انت ضحكت وقهقهت وأول لما سكت راح لاطشك بالقلم علي وشك .. قعدت تعيط .. ونسيت ضحكك

وهي هي كنت قاعد مع فلانه ومستمتع ماسك ايدها وحاسس انك طاير ماشي معاك واحده كل الناس تتمني نظره منها ..

وكنت ماشي معاها وبالفعل كنت سعيد . وطاير من الفرح ..

بس لما عرفت بعد كده انها بتتمصلح عليك عشان بتشحنلها تليفونها وبتخرجها معاك بالعربيه وبتدخلها معاك النادي ببلاش .. وبتسفرها معاك .

وعرفت هي قالت عليك ايه لصحابك .. وقتها كنت أتعس انسان في الدنيا وهي كانت أبغض انسانه ليك في الدنيا ..

سالت واحد تالت .. وقالك مش هيريحك يابني غير نطلع نسافر مع بعض سفريه او نروح رحله .. وانا همتعك ..

وسافرت معاه وكنت سعيد هناك .. واول لما رجعت أبوك قابلك علي الباب وعرف انك كنت خدت 200 جنيه من محفظته وهو نايم راح لطشك علي خلقتك ..

وفضلت انت مخنوق لمدة شهر بسبب الموقف ده ؟؟

كل لما تمشي في طريق وتظن انه سعاده يطلع في الاخر نكد ..

قولي هل عمرك .. قعدت شهر علي بعضه سعيد ؟

هل وهل وهل ..

يا اخي هي شوية معادلات تعالى نحسها مع بعض ..

الاول كل السعاده الي فاتت وجربتها انت دي سعادة إما مؤقته أو سعادة جزئيه .. يعني قلبك كان بيرفرف وانت ماشي مع فلانه ( سعاده وقتيه )

لما شربت الحشيش ( دي سعادة جزئية ) يعني عملت متعه لجزء منك .. واسئل أي واحد وهو بيشرب وقوله قلبك سعيد ؟

الي بيزني بيمتع جسده ( متعه وقتيه وجزئيه ) قلبه فين ؟

اسئل أي اتنين زنوا والعياذ بالله شوفهم بعد الزنا طايقين بعض ؟ طايقين يبصوا في وش بعض ؟؟

بيكونوا قرفانين من بعض والله .. قرفان حته يبص في وشها .. شهوة وقتيه شهوه حيوانيه ..

السعادة الكليه الدائمه للقلب بتكون من الله لانه وحده هو الي يقدر في الدنيا دي يخليك سعيد أو حزين ..

يقدر يعافيك من الامراض فهتكون سعيد

يقدر ينجحك وتكون سعيد

يقدر يخليك تخلف أولاد وذرية صالحه وتكون سعيد

يقدر يخليك تترقي في الشغل وتكون سعيد

يقدر يهدي سرك ويستر ذنبك ويرقق قلبك فهتكون سعيد ..

يقدر يبعدك عن الاحقاد والاحساد والحوادث والفتن فتكون سعيد ..

ربك يقدر يخلي حياتك سعاده ..

ويقدر سبحانه يبتليك بالامراض ويجعلك لاتصبر فتكون تعيس

ويقدر يسلط علي الدنيا واحقادها واهلها وشرورها ويسلط عليك الطواغيت والطغاه والظلمه

يقدر يسلط عليك نفسك وقلبك يقدر يفضحك بذنبك في الدنيا وهتكون تعيس

يقدر يفصلك من كل شغل تشتغلها يقدر يخليك فاشل وجبان

يقدر يسلط عليك ناموسه تقرفك طول الليل وهتكون تعيس ..

شوف ناموسه والله ممكن تكون موكله ليك انت بس تقرفك طول حياتك ..

فوصلنا إن

السعادة دي بتيجي منين وبتروح فين ؟؟

السعاده بتيجي من عند ربنا

وبتروح فين ؟ للقلب ..

السعاده مش سعادة جسد ولا سعادة وقتيه

انت ممكن تسمع اغاني وتريح دماغك

وتقدر تشم ريحه جميله وتمتع نخاشيشك ( مش عارف يعني ايه ومعرفش معناها بالفصحى )

وممكن تاكل حاجه حلوه وتمتع ريقك .

وممكن تعمل كريم للشعر وتمتع شعرك وتعمل حمام بخار وتمتع جلدك ..

فين قلبك قولي قلبك هيستريح ازاي ؟؟

قال صلي الله عليه وسلم

ما من قلب من قلوب العباد إلا وهو بين إصبعين من أصابع الرحمن ،إن شاء أن يقيمه أقامه ،وإن شاء أن يزيغه أزاغه

وقال عليه الصلاه والسلام

إن قلوب العباد بين إصبعين من أصابع الرحمن ،فإذا أراد أن يقلب قلب عبد قلبه

صححه الالباني

عمال تدور علي السعاده هناك وهنا .. وتسأل فلان وعلان

وتقلد فلان وعلان

وانتي يا اختي عماله تقلدي فلانه وتغيري من فلانه وفكراها سعيده ..

ياجماعه

ظهور البسمه على الوجه شيء وابتسام القلب شيء اخر

القهقها وان واحد يموت من الضحك لما يسمع نكته شيء .. وان الواحد قلبه يكون طاير من الفرح ( بجد ) شيء تاني

سيبكم من المظاهر ..

مش شرط ان فلان غني يبقي سعيد .. وان فلان فقير يبقي عايش في تعاسه ..

اهم شيء قلبه عامل ازاي ؟

هقولك فكرة كويسه ..

عايز تعرف تفرق بين السعاده الحقيقه والسعادة المزيفه ..

السعادة الحقيقة .. صفاتها

1-بتكون في القلب

2-لا يزيدها أمر دنيا إلا اذا كان هذا الامر عوناً علي أمر الاخرة ( يعني لو اتقال للسعيد بالله سيكون سنعطي لك مليووون جنيه , لن يزاد قلبه سعاده الا اذا علم من نفسه انها ستقترب الي الله بهذا المال )

3-لا ينقصها أمر دنيا إلا اذا كان ينقص من أمر الاخره .. ( كالمناصب هو يعلم من نفسه ان منصبه هذا يجعله في مسئوليه أكبر امام الله وسيسأل عن هذا امام الله )

السعاده المزيفه او الوقتيه او الجزئيه

1-تكون للجسد واعضاءه كشهوة البهائم كالطعام والشراب والجماع واللعب وغيره ..

2-ينقصها إي أمر دنيوي حتى وإن به ثواب ( يعني كان مثلاً مواعد اصحابه في شرم الشيخ و الطياره نزلت غلط في مكة أو المدينة هنا زعل جداً انه منزلش شرم حتى وان وصل لحد بيت الله !!!

3-يزيدها أي امر دنيوي ولو به خراب الدين والاخرة

( يفرح جداً لو اتكلم علي فلان او علان ويستمتع ويسعد بده مع انه في خراب الدين والاخره )

ولكلامي هذا دليل

قال صلي الله عليه وسلم

عجبا لأمر المؤمن .إن أمره كله خير . وليسذاك لأحد إلا للمؤمن .إن أصابته سراء شكر . فكان خيرا له . وإن أصابته ضراء صبر . فكان خيرا له " صحيح مسلم "

ليه ذكرت ليك المثال الطوووويل بتاع الكمبيوتر في الاول ؟؟

عشان أوصلك أن محدش هيقدر يفهم في الكمبيوتر قد الي صنع الكمبيوتر هو الوحيد الي عارف كل جزئيه فيه وايه ينفعه وايه يضره .. وايه يخليه سريع وايه يبطئه وايه انظمه الحمايه ليه وبيكون حاطط في دماغه بعد كده ايه الموديل الجديد الي نازل .. وهكذا .

فكل شيء لو مش عارف تستخدمه لازم ترجع للي عمله او صنعه.. عشان تقدر تستفاد الاستفاده الكليه من الشيء ده ..

يبقي لما تكون عايز سعاده لقلبك تعالي نسأل ربنا ونشوف لان هو الي خلق قلبك وخلقك انت وسبحانه يعلم ما يسعد هذا القلب وما يفرحه وما يغمه ويحزنه هو أعلم متى يحيي القلب حياة الضنك والبؤس ..

ربنا قال السبب ..

قال سبحانه :

وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكاً وَنَحْشُرُهُ يَوْمَ الْقِيَامَةِ أَعْمَى [طه : 124]

واحد يقولي بس انا مش بشتكي من قلبي انا معايه فلوس معيشاني احسن عيشه

أقوله حتى ولو كنت سعيد .. السعاده الي انت شاعر بيها دي متجيش حاجه جنب السعاده الحقيقه

زي الي يجيب جهاز كمبيوتر جديد لانج حاجه يعني كورت 2 ديو وشاشة Lcd 22" وسماعات creative يعني ماركات عاليه وامكانيات عاليه وتلاقيه مركب رامات 32 بس إيه ده !!!!

بالرغم ان الجهاز امكانياته تحفه لكن الرامات قليله جداً
فعلاً هتستمع بالشاشه الكبيره والسماعات التحفه والكيسا الجميله لكن الجهاز هيهنج معاك في أي وقت صحيح هتكون مستمتع لكن فين المتعه والجهااااااز بطئ وممكن يقف معاك في أي وقت !!!

قلبك ياعم انت مستمتع بيه وفرحان وسعيد .. يابني انت مضحوك عليك ..

انت لسا محستش بالسعاده بجد ..

السعادة الحقيقه إنك تحس بهدوء في قلبك .. لا تحس بقلق ولا إضطراب معاني قوية ماتتحكيش ..

قلبك ثم قلبك ثم قلبك ..

إبحث عن السعادة في قلبك .

إذا

السعادة من الله إلى القلب ...

وبما إن السعادة من عند الله واتفقنا انك محتاج السعاده عشان قلبك

إذا إعلم أن ما عند الله لا ينال بمعصيته ولا ينال إلا بطاعته طيب . لينا إحنا كإخوه

وبنقول قال الله وقال الرسول وعاملين فيها شيوخ

ساعات بيكون قلبنا فيه حزن ومش علطول بنكون سعداء .. مع اننا عارفين ان السعاده من الله

كل واحد لازم يعرف ترمومتر نفسه

انا عن نفسي لما بكون مغموم ومهموم ( لامر دنيوي ) أعرف اني بعدت عن الله

يعني ممكن كل واحد مننا يقيس بعده وقربه من الله بمدى سعادته قلبه وبقول قلبه لا أقول الابتسام او الضحك او التهريج ..

يعلم بسعاده قلبه وهدوء واطمئنان قلبه .

استثناء : بعض الناس الي ارتفع ايمانهم عندهم هم يلازم قلبهم كخوف الاخرة والحساب والعذاب وهمه كيف يموت وكيف يلقى ربه .. نسأل الله ان يجعلني واياكم منه ( دي مرتبه عاليه نسأل الله ان يكون همنا هم واحد .. ) نسال الله السلامه .. كلامي مكنش عن دول كلامي عن أهل الدنيا

للموضوع تكمله ..

كيف تتحقق السعاده في القلب بالطاعة ؟ !!!

نسألكم الدعاء بظهر الغيب ...

الموضوع : آآآآآآآآآآآه يا قلبــــي يانـــي المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة