على الأصل دور !!

لما نحب نتأكد من سلامة أي حاجة بنروح نشوف أصلها كان عامل ازاي ..

علشان نقدر نحكم إذا كانت الحاجة دي سليمة ( زي الأصل بالضبط ) وللا اتغيرت لأي سبب من الأسباب ..

لما نبقى عارفين أصل الشيء كان عامل ازاي ، نقدر نحكم عليه بعد كدة في أي وقت إذا كان لسة سليم زي الأصل وللا لأ ..

والطريقة دي فعالة جداً في التشخيص السليم ..

يعني مثلاً الطبيب قبل ما يتخرج من كلية الطب بيتعرف الأول على شكل أعضاء جسم الإنسان السليم ( القلب - الرئة - الكبد وغيرها بحسب تخصصه )

علشان كدة بمجرد انه يشوف أشعة على رئة مريضة مثلاً بيلاحظ الفرق ، ويقدر يقول ان الرئة دي مش سليمة وفيها داء ومحتاجة علاج ..

( يقدر يشخّص الحالة بالتعرف على شكل التغيير اللي حصل بعد ما يقارنه بالصورة الأصلية اللي هو عارفها )

نفس الشيء في مجال الأدوية .. بعض الأدوية السائلة ( الحقن أو أدوية الشرب ) ممكن بعد فترة يترسب فيها راسب من تحت ، أو يتغير لونها أو درجة لزوجتها ، وده دليل على فسادها أو تغير تكوينها .. وبالتالي الدليل على كونها غير صالحة للاستخدام وغير مفيدة في العلاج !!

علشان كدة الصيدلي لازم يبقى عارف شكل الدواء السليم عامل ازاي ، علشان يقدر يكتشف بسهولة ويسر أي زجاجة أو عبوة حصل فيها ترسيب أو تغير وفساد ..

طيب لو معرفتش الشكل الأصلي للشيء ، فيها مشكلة دي ؟!

طبعاً .. مُشكلة كبيرة كمان !!

لأن في الحالة دي ممكن أي حد يخدعني ويقول لي ان الحاجة دي المفروض يبقى شكلها كذا وكذا .. وييجي واحد تاني يقول لي لأ طبعاً ، الحاجة دي شكلها مش كدة خالص .. دي المفروض يبقى شكلها كذا وكذا ..!!

طيب أصدق مين ؟!

علشان أقدر أحكم على مدى صحة أي شيء لازم أدور على أصله وأتعرف عليه عن قرب .. علشان أقدر أكتشف أي عيب أوتغيير أو تشوه بعد كدة ..

يبقى دي قاعدة عامة متفقين عليها.. تمام كدة ؟!

طيب إيه علاقة الكلام ده بلذة الطاعة ؟!

طبعاً العلاقة وثيقة جداً ..

هل يُعقل اننا نطبق المبدأ ده في أصغر أمور حياتنا الدنيوية وننسى نطبقه في علاقتنا بالله ؟!!

يعني مثلاً إزاي أصلي صح ؟!

إزاي أصوم صح ؟!

إزاي أحقق الإخلاص صح ؟!

إزاي أذكر ربنا صح ؟!

إزاي أدعو الناس لدين الله صح ؟!

( صح ) هنا معناها : على مُراد الله

يعني إزاي أقدر أحقق الحاجات دي بالشكل الصحيح الذي يرتضيه الله عز وجل ، فتكون علاقتي بالله وحياتي كلها على مراد الله عز وجل ؟!!

يا ترى ازاي ؟!

ملهاش غير حل واحد ...

على الأصل دور ..

علشان أقدر أحقق الحاجات دي صح ، يبقى لازم أشوف أصلها كان عامل ازاي ..

يعني أجيبها من المنبع ( زي ما بيقولوا )

أشوف النبي صلى الله عليه وسلم كان بيعملها ازاي ..

كان بيصلي ازاي ؟!

كان بيصوم ازاي ؟!

كان بيطبق أوامر الله عز وجل كلها في حياته ازاي ؟!!

هو ده أصل الدين .. وهو ده أصل الطاعات والعبادات كلها

لازم أتعرف على الأصل وأدور عليه ، علشان أقدر أطبق صح .. وأقدر أكتشف وأشخص أي مشكلة أو قصور في علاقتي بالله وفي طاعاتي ..

علشان أقدر أذوق صح ، وأحس باللذة صح