ياعم روووووق .... ساعه لقلبك .... وساعه لربك !

10/08/2009

طارق و باسم إتنين أصحاب قوى

طارق ملتزم ... و باسم شويه كدة وشويه كدة ، ما بين البنين يعنى !!

فى يوم طارق هو داخل على المحاضرة بيدور على باسم عشان ياخده ويروحوا يصلوا العصر سوا ، فعمال يدور عليه فى المدرج ومش لاقيه ، فقام رن على موبايل باسم ، فاباسم جاي يرفع الموبايل عشان يرد ، طارق شاورله ونداله من وسط شلة بنات على ولاد ، واحد بيشرب سجاير وواحده مشغله اغانى .... والباقى فاتحين فى مواضيع مع بعض !

طارق نده على باسم من وسطهم .. وقاله :

طارق : إيه يا باسم دا ؟

باسم : إيه يا عمونا فيه إيه ، هوا انا عملت حاجه غلظ ؟!!

طارق :حاجه بس !! ، دول كذا حاجه

حبيبي إنت مش عارف الإختلاط مع البنات والأغاني والسجاير وكل الكلام دا مينفعش ويغضب ربنا

باسم : اختلاط ايه يعم بس و بتاع ايه .. متحبكهاش اوى كدا .. دول زيى اخواتى بالضبط

طارق : اخواتك ؟؟!! .. يعنى ايه زى اخواتك .. طب صلى على النبى

باسم : عليه الصلاة و السلام

طارق : بص يا بسوم . هسالك سؤال و تجاوبنى عليه بصراحة .. تخيل دلوقتى انك داخل الجامعة و بتبص لاقيت اختك واقفة الوقفة دى مع شوية شباب .. يا ترى هيكون دا عادى بالنسبه لك و هتقول ان دول زى اخواتها؟؟

باسم : امممممم ... يعنى .. عاا عااااا .. عاادى يعنى ... هى بتعمل حاجة غلط ... و كمان انا اختى واثك فيها ثكة عمياااااء يا برنس ...

انا اختى لو مشيت مع ميت راجل متاكد انها لا يمكن تغلط .. دى اختى و انا عارفها

طارق : طيب بص يا بسوم .. دلوقتى لو اختـــ ...

باسم (قاطعه): بص يا طروق يا حبيبى .. كلامك جميل و كل حاجة ... بس بردو احنا واقفين باحترامنا و كمان يا مان خد بالك اننا واقفين فى مكان عام و فى وسط البشر كلها .. يعنى العملية نايس خالص .. و كمان احنا بنكلم فى الدراسة و المذاكرة مبنقلش حاجة عيب

طارق : طيب بص يا حبيبي وإحنا واقفين كدة افتح بلوتوث الموبايل بتاعك وخد المحاضره دي للشيخ هاني حلمي و وإنت مروح إبقى إسمعها

حمل المحاضره من هنا

وقولي رائيك إيه فى إللى سمعته .

باسم بيفتح البلتوث و طارق يكمل كلام

طارق : ماشى يا بسوم يا حبيبى .. انا عارف انك واقف فى مكان عام وواقف باحترامك و كل حاجة ... بس براحة كدا .. انت بتؤمن بربنا و بتصدق النبى صلى الله عليه و سلم و لا لأ

باسم : طبعا يا معلم انت بتكلم فى ايه .. لحد هنا بقا و ستوب

طارق : جميل اوى .. يعنى لو قلتلك ربنا قال او النبى قال تصدقهم

باسم : شوووور

طارق : طيب .. دلوقتى انت مسمعتش قبل كدا الاية اللى بتقول
( و إذا سألتموهن متاعا فسئلوهن من وراء حجاب ذلكم أطهر لقلوبكم و قلوبهن )

باسم : اممم .. بينى اه سمعتها قبل كدا بس دى مالها بموضوعنا دلوقتى

طارق : مالها ازاى .. دا ربنا بيقول لما تطلب من واحدة حاجة او عايز تكلمها فى مسألة مهمة و ضرورية لازم يكون فى حجاب بينك و بينها

باسم : يعنى لما اكلم واحدة غريبة عنى فى حاجة ضرورية كمان لازم يكون فى بينا حجاب ... طب دا ليه باه؟؟

طارق : ربنا قالك ليه ... ذلكم أزكى لقلوبكم و قلوبهن .. يعنى دا انقى لقلوبكم و اطهر ليها و أمن من الفتنة ... و كمان دا بيقول لمين ... دا بيقول للصحابة و أمهات المؤمنين ... ما بالك بينا احنا يا باسم

باسم : امممممم .... مش عارف الصراحة .. بس انا مش عارف انت مضلمها ليه كدا ... يعم الدنيا ايزى مش كدا يعنى ...

الصراحة مش مقتنع بردو لاني مبعملش حاجة غلط

صوت نغمه صادر من موبايل باسم ينبه على وصول الدرس

طارق : يعم انا لا مضلمها و لا حاجة ... طب هقلك حاجة تانية

اكيد طبعا سمعت عن غض البصر و عارف ان ربنا امرنا بغض البصر و نهى عن انى ابص على اى واحدة عشان منقعش فى الفتنة .. صح؟؟

باسم : اكيد طبعا بس دا ماله دا كمان بموضوعنا

طارق : ماله ازاى يا صاحبى .. يعنى انت عايز تقنعنى انك و انت واقف مع البنات دول متبصش على اى واحدة فيهم خالص

باسم : ايوا .. بسس ... ايه ... امممم .. يعنى انت عارف ان دى نظرة بريئه خالص ... و هو انا يعنى هحبها ؟؟

طارق : يا سيدى انا مقلتش انك هتحبها و لا حاجة بس انت ايش ضمنك ان النظرة دى متوقعكش فى فتنة او حتى توقعها هى

باسم : هههههه .. فتنة مين يعم بس و بتاع ايه .. انت شايفنى مقطف !!

طارق : هههههههه انا عارف والله ... بس بردوا الشيطان شاطر ... و كمان مينفعش تقول انى مش هقع فى الفتنة .. انت عارف الصحابة و قدرهم طبعا ؟؟؟

باسم : انت بتكلم فى ايه .. ايوا طبعا ... انت شايفنى يهودى!!

طارق : جميل اوى .. اهو الصحابة نفسهم اللى كانوا مع النبى كانوا لا يامنوا على نفسهم من الوقوع فى الفتنة .. ما بالك بينا يا صاحبى !!

باسم : يااااااه للدرجة دى

طارق : و اكتر من كدا كمان يا باسم ... و كمان لازم تعرف يا باسم ان (كما تدين تدان)

باسم : مين ؟؟!!

طارق : كما تدين تدان .. يعنى يا باسم اللى بتعملوا النهارده صدقنى هيطلع عليك بكرا و ياما سمعنا قصص من دى مفيش وقت احكيهالك دلوقتى .. يعنى تاكد يا باسم لو انت النهارده استهونت ببنات الناس و استغليت جهلهم هتلاقى ربنا عاقبك فى اهل بيتك .. و هتلاقى اختك أو بنتك لما تتجوز وتخلف إن شاء الله او قريبتك بردو بيضحك عليها من واحد و بيستغل جهلها كدا

باسم :امممممممم ... ياعمي روق بس ... انا مقدر كلامك دا كله بس هو يعنى مش النبى بيقول " ساعه لقلبك وساعه لربك " !!

طارق : نعم يا خويا ، ساعه لقلبك وساعه لربك !!

إنت أصلاً تعرف اصل المقوله دى إيه ؟! والمقصود بيها إيه !

باسم شكله إتلخبط وحس إنه وقع فى حاجه غلط

فقال : لااا لاا .. الصراحة مش عاارف اصلها ايه بالظبط ؟؟

طارق : بص يا بسوم ، إنت صاحبي وحبيبي و بحبك فى الله ، ومش عايزك تعمل حاجه غلط ، عارف اصل مقوله ساعه وساعه إيه قبل ما تتحور التحور الغريب العجيب دا ؟!

باسم : لاء !

طارق : بص ياعمونا

فى يوم من أيام النبي ، متصلي عليه مبتصليش ليه

باسم : صلى الله عليه وسلم

طارق : فى يوم مر سيدنا ابو بكر الصديق رضي الله عنه بسيدنا حنظله رضى الله عنه فوجدة يبكي ، فقال له ما يبكيك يا حنظله ؟
قال حنظله " نافق حنظله " ،

تخيل لما صحابي كبير من بين صحابه النبي صلى الله عليه وسلم يقول إنه نافق دا يبقى اكيد عمل حاجه كبيرة جداً

باسم : اكيد .

طارق : طيب بص يا سيدي عمل إيه

قال حنظله يا ابا بكر يا أبا بكر نكون عند رسول الله صلى الله عليه و سلم يذكرنا بالنار والجنة كأنا رأي عين فإذا رجعنا إلى الأزواج والضيعة نسينا كثيرا

زي ما حالنا دلوقتى نسمع درس او خطبه نحس فيها بالخشوع والخضوع لله عز وجل وبمجرد ما نخرج من الخطبه او نحلص سماع الدرس نرجع تانى لحياتنا ، وننسى كتير من الخشوع والموعظه إللى سمعناها .

باسم : اه فعلاً كتير قوى بيحصل معايا كدة لدرجة إنى قولت انا خلاص مش نافع معايا حاجه وإتعقدت !

طارق : إستنى بس عُقد إيه الله يهديك اسمع بس للآخر

قال له ابو بكر رضى الله عنه والله انا مثلك ، انطلق بنا إلى الرسول صلى الله عليه وسلم

، يُفتينا فى إللى بيحصل لينا دا ، فلما ذهبا للنبي صلى الله عليه وسلم

فلما رآه رسول الله صلى الله عليه و سلم قال مالك ياحنظلة؟ قال نافق حنظلة يا رسول الله نكون عندك تذكرنا بالنار والجنة كأنا رأي عين فإذا رجعنا عافسنا الأزواج والضيعة ونسينا كثيرا

، دا بيعمل كل حاجه حلال يعنى مبيخرجش ويسمع اغانى او يشرب سجاير على باب المسجد اول لما الصلاه تخلص ولا تانى بيكلم بنات او يعاكس او او او ... حاجت معظم شبابنا بيعملها .. المهم

فقال رسول الله صلى الله عليه وسلم لو تدومون على الحال التي تقومون بها من عندي لصافحتكم الملائكة في مجالسكم وفي طرقكم وعلى فرشكم ، ولكن ياحنظلة ساعة وساعة وساعة وساعة حديث صحيح .

شفت بقا ياعم اصل المقوله إيه قبل ما تتحور للغلط دا
يعنى الأصل إنك تبقى فى طاعه الله عز وجل ولما تخرج من الطاعه دى متخرجش لمعصيه لاء تخرج لطاعه برضة

فحياة المؤمن دائرة بين الطاعة وبين المباح، أما أن يكون البديل عن الطاعة هو المعصية والذنوب والإجرام فهذا هو المفهوم غير صحيح.

فهمت ياعم !

باسم : ياه دا انا كنت فاهمها غير كدة خالص

طارق : طيب كويس اديك فهمتها و مش عايزك تزعل منى لو شديت عليك شوية ... انا والله بحبك و انت زى اخويا و انا عايزك بس تبعد عن اى حاجة تغضب ربنا عشان تدخل الجنة و تكون مع النبى – صلى الله عليه و سلم

باسم : عيب عليك يا طروق إيه اللى انت بتقوله دا .. انت اجننت و لا ايه .. انا ازعل منك بردو .. طب دا انا بجد مش عارف اشكرك ازاى .. انت بجد فوقتنى و عرفتنى حاجات انا مكنتش اعرفها خالص ... يا سلام يا طارق لو كل الاصحاب زيك كدا ... كان الواحد استريح كتيير

طارق : طيب خلاص الحمد لله انك عرفت الصح و هتبدا تبعد عن اى حاجة تغضب ربنا .. يلا تعالى بقى دلوقتى نصلي العصر فى الجماعه قبل ما المحاضره تبداء .

باسم : يلا بينا يا صاحبى

*********************

نسأل الله ان يرزقنا ألإخلاص فى القول والعمل

آمين