صدقنـي أنا عـارف

10/08/2009

صدّقنـي أنا عـارف

صدقني أنا عارف إن الصلاة فرض وإني لازم أصلّي في الجامع

صدقني أنا عارف إن السجاير حرام وإنها بتضيع فلوسي وصحتي

صدقني أنا عارف ان القهاوي حرام

صدقني أنا عارف إن المفروض ماارتبطش بالبنات وأكلمهم.. وإن اللي هعمله معاهم هيتردلي في عيلتي

صدقني أنا عارف إن أنا على غلط وإن أنا كده قريب من النار

صدقني أنا عارف أن الحشيش والإستيلا والمخدرات حرام وبتضيعلي عقلي وبتخليني زي الحيوان

صدقني أنا مش وحش وأنا بحب ربنا وبحب النبي صلي الله عليه وسلم
صدقني.. وصدقني.. وصدقني

صدقني أنا عارفة إن شعري لازم أغطيه وإني بآخد سيئة بكل شعرة بتبان منه.. وإن كل شاب بيتفتن بيّا بآخد سيئة عليه

صدقني أنا عارفة إني لازم أصلي.. وإني أحافظ على نفسي لحد ما أتجوّز
صدقني أنا عارفة إن المفروض مقعدش على قهاوي وأشرب شيشة
صدقني أنا عارفة إن المفروض محدش يلمسني غير اللي يحلّ ليّا بس

صدقني أنا عارفة إني المفروض ما أنزلش من بيتنا بالهدوم دي
صدقني.. وصدقني.. وصدقني
وفي الآخر إدعيلي ربنا يهديني

معلومة بسيطة : المعرفة غير الإيمان

انا عارف إنك عارف ان الصلاة فرض, مش كفاية
كلنا عارفين ان اللي بيسمع الأذان بيوطّي صوت الكاسيت وقت الأذان.. إنما لو كان مؤمن كان نزل صلّى

انا عارف إنك عارفة إن الحجاب فرض .. بس فين حجابك؟ فين إيمانك؟ إنك لازم تكوني عفيفة.. إنك أغلى من الجواهر.. متقوليش القماشة اللي على الراس دي حجاب مش هنضحك على بعض أنا بتكلم عن الحجاب اللى يرضى ربنا عنك و يُدخلك به الجنة

إنتوا فين؟.. ورايحين فين؟

انتوا مستنيين إيه ؟

مستنيين إن أخوك أوأختك أو بنتك تموت قدامك وهي بتعمل المعصية؟
مستني إن ربنا يبتليك بسرطان ولاّ شلل علشان تتوب وتفوق من اللي انت فيه؟
مستنية إن ربنا يبتليكي بمرض جلدي عشان تخبّي لحمك اللي مفرّجة الناس عليه؟ ولاّ يوقعلك شعرك اللي مطيّراه على الناس؟
ولا مستني ربنا يعميك بعينك اللي ما بتسيبش بنت معدية إلا وفحصت بيها كل حتّه فيها؟
مستني إنك تدخل القبر ويسألك الملكين: من ربك؟ ومن نبيك؟ وما دينك؟
هترد بإيه؟

هرتد باللي كنت عايش عليه في الدنيا؟

كنت بتعيّط عشان حبيبك.. ومعيّطش من خشية ربنا؟

كنت بتبص للبنات ومبصّتش في كتابه تقرأ قرآنه؟

هتقول إيه لنبيك على الحوض؟
هتقوله انا بحبك بس مبسمعش كلامك؟

فوقوا بقى

فوقوا بقى قبل ما تموتوا

الموضوع : صدقنـي أنا عـارف المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

عضو جديد عدد المساهمات : 7

ماشاالله يسلموووووو
جزاك الله خيراااااااااا

الموضوع : صدقنـي أنا عـارف المصدر : مسجد الهدي المحمدي الكاتب: Nour el7ak
توقيع العضو/ه :Nour el7ak

10/08/2009

جزانا واياكم

الموضوع : صدقنـي أنا عـارف المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة