أحلى حياةمدير عام المنتدى
تاريخ التسجيل : 10/08/2009
 |  موضوع: لسه بتدور على حاجة تغيرك ؟  الجمعة 14 يناير 2011, 10:59 pm | |
| 
لسه بتدور على حاجة تغيرك ؟
نفسك تتغير بس مش لاقى حافز ؟
تابعوا معانا بس لازم نعرف كويس إن أهم حاجة "الصدق" فخليك صادق من البداية ولو عايز بجد أكيد هتوصل
الحل فى كلمتين :
" نفسى أشوفه "
مشتاق لربنا ولا لأ ؟
المعنى ده لو سيطر على قلبك بصدق تأكد ساعتها إنك هتكون إنسان تانى
وعلشان تشتاق لربنا سبحانه وتعالى يبقى لازم تحبه وعلشان تحبه يبقى لازم تعرفه
معرفة >> محبة >> شوق
أول حاجة معرفة الله سبحانه وتعالى , إنك تعرف أسماء ربنا وصفاته
واحد هيقولى إحنا شبعنا من البُق ده ومفيش فايدة !!
إحنا للأسف مش بنعيش المعانى دى بقلوبنا فتبقى بالنسبة مجرد كلام مستهلك
لكن النهاردة عايزين ننظر للمعانى دى نظرة تانية
اقرأ معى قوله سبحانه وتعالى : " يَوْمَ
تَجِدُ كُلّ نَفْسٍ مّا عَمِلَتْ مِنْ خَيْرٍ مّحْضَراً وَمَا عَمِلَتْ
مِن سُوَءٍ تَوَدّ لَوْ أَنّ بَيْنَهَا وَبَيْنَهُ أَمَدَاً بَعِيداً
وَيُحَذّرُكُمُ اللّهُ نَفْسَهُ وَاللّهُ رَؤُوفُ بِالْعِبَادِ "
قف عند قوله سبحانه " وَيُحَذّرُكُمُ اللّهُ نَفْسَهُ " حس بيها وشوف وقعها على قلبك , واستشعر مدى عظمة الله سبحانه وتعالى وعزته وجبروته
ثم انعطف إلى قوله سبحانه " وَاللّهُ رَؤُوفُ بِالْعِبَادِ " وحس بمدى ودّ الله سبحانه وتعالى بعباده
معانى عالية فوق الوصف
ولما تعيش مع اسم الله " الحليم " هيجننك
أصله مش بيسيبك تعمل اللى بيغضبه وبس , ده كمان :
1- بيديك القوة اللى بتعمل بيها المعاصى .
2- وبيسترك فما بتنزلش من نظر الناس .
3- وبيحلم عليك ولا يعجل لك العقوبة كأنه يقول لك " اعمل ما بدا لك ومسيرك هترجع "
4- وبيوفقك للتوبة .
5- ويقبلها منك , ويجازيك عليها .
6- ويتجاوز عن السيئة ويبدلها لك حسنة .
7- ولا يعيرك بذنبك .
سبحانه سبحانه وَهُوَ الغَفُورُ الوَدُودُ "
حس بأه يا أخى
فالمعانى ده تولد فى قلبك الحياء منه سبحانه وتعالى وتتمنى قربه
ونقطة معرفة الله سبحانه وتعالى هناخد لها واجب عملى : استخراج آيات الأسماء والصفات من ورد القرءان بتاعنا والوقوف عندها ونحاول نعيش معانيها
ولو عرفت ربنا صح هتحبه
وعالم المحبة ده عالم تانى
تعالوا نشوفهم قالوا ايه عن حب ربنا سبحانه وتعالى :
قالوا : المحبة ميل دائم بقلب هائم
طول الوقت بأحن له
وقالوا : مراقبة الحبيب فى المشهد والمغيب
مستشعر اطلاعه عليك دايما حاسس إنه جنبك , شايفك ومراقبك
وقالوا : مواطئة القلب لمراد الرب
فإرادتك تبقى إرادته ومرادك يبقى مراده , أصله حبيبك , وهواك هو مايريده سبحانه وتعالى , ولا اختيار لك مع إختياره .
نحن له عبيد يفعل بنا ما يريد وأحبه إليه أحبه إلىّ
وقالوا : المحب حقا الذى يستقل الكثير من نفسه ويستكثر القليل من حبيبه
فلو أعطاك حاجة حتى لو كانت فى نظرك قليلة تراها أعظم شئ لديك , أصله حبيبك
لما تقوم الفجر مثلا : ياااه اللهم لك الحمد يارب هوا أنا استاهل إنى أصحى وناس كتير نايمة
فتحمد ربنا إن جعلك أهلا لتوفيقه وتقطع نفسك فى العبادة وتحس إنك مقصر
وقالوا : أن تغار على المحبوب أن يحبه مثلك
" وَفِي ذَلِكَ فَلْيَتَنَافَسِ الْمُتَنَافِسُونَ "
قال وهيب بن الورد : إن استطعت ألا يسبقك إلى الله أحد فافعل
علشان كده الحب والشوق بيفكوا القيود وبيدوك دافع الإنطلاق
وقال بعض السلف : لو أن رجلا سمع بأن أحدا أطوع لله منه فانصدع قلبه فمات لم يكن ذلك بعجب
وقال رجل لمالك بن دينار : رأيت فى المنام مناديا ينادى " أيها الناس الرحيل الرحيل " فما رأيت أحدا يرتحل إلا محمد بن واسع . فصاح مالك بن دينار وغشى عليه
هو فيه حد سبق وأنا قاعد كده بلعب
يااااااه
فى الدنيا كله قاعد بيقطع فى نفسه لكن فى الآخرة ....!!
تقوله فلان ختم القرءان
ما شاء الله ربنا يكرمه
وفلان ده صوام وقوام
ربنا يزيده
طب وأنت فين ؟ ليه فى الآخرة بنكسل وبنرضى بالقليل
الخلاصة
المحبة ميلك إلى المحبوب بكليتك
وإيثارك له على نفسك وروحك
ثم موافقته سرا وجهرا
ثم علمك بتقصيرك فى حبه
فياترى أنت بتحب ربنا بجد؟
طيب خد واجب عملى علشان تثبت :
اعصر مخك معايا واكتب القرارات اللى آثرت فيها محبة الله تعالى على نفسك
مفيش مرة كده كنت تعبان ومكسل لكن بالرغم من كده قاومت وآثرت محبة ربنا ونزلت صليت فى الجامع ؟!!
ولا مرة أصحابك عزموك على سهرة وأنت رفضت حبا لربنا سبحانه وتعالى ؟
فكر واكتب
بالله عليك مش مشتاق له ؟
مش حاسس إنه وحشك ؟
مش نفسك تشوفه ؟
بس مش شوق مستعار مش شوق كاذب , تشوفه بجد زى سيدنا موسى عليه السلام لما التقى بمولاه شوف : " وَعَجِلْتُ إِلَيْكَ رَبّ لِتَرْضَىَ "
وما كاد إلا يقول له : " رَبّ أَرِنِيَ أَنظُرْ إِلَيْكَ "
نفسى أشوفك يارب
وأنت مش نفسك تشوفه ؟
" قَالَ لَن تَرَانِي "
وكم أنّ موسى من لن
قد ايه لن دى زعلته وحرقت قلبه
بتقوله فى كل صلاة رب أرنى أنظر إليك ؟!!
يارب نفسى أملى عنيا منك
نفسى ابقى فى جوارك
آسية كان عندها المعنى ده عميييييييييييييييييييييييق
فقالت " رَبّ ابْنِ لِي عِندَكَ بَيْتاً فِي الْجَنّةِ "
قال العلماء : اختارت الجار قبل الدار
تشوف معنى الشوق والنبى صلى الله عليه وسلم يتعرض للمطر ويقول :
" حديث عهد بربه .. حديث عهد بربه "
ده لسه نازل من عند ربنا حالا
تشوفه وهو رافع السبابة على فراش الموت :
" بل الرفيق الأعلى .. بل الرفيق الأعلى "
كفاية دنيا لغاية كده
وتشوفه فى الخليل إبراهيم ,
قال تعالى : " إِنّ إِبْرَاهِيمَ لأوّاهٌ حَلِيمٌ "
بعض المفسرين قالوا معنى حلو أوى : أواه يعنى شكاء من الشكوى
بيشتكى ايه ؟
بيشتكى أذى الناس
حليم : كان حليما عليهم
فقالوا :لم يكن يشتكى أذى الناس فقط , كان يشتكى زفرة قلبه من الشوق إلى جمال ربه
بيشتكى إنه مش شايفه
يارب اكتب لنا رؤيتك يارب
والواجب العملى للشوق : استخراج آيات الشوق فى القرءان ونعيشها ونطلع المعانى منها زى ما حسناها
طلعها بإحساسك وعيشها
ويبقى ده شعارنا " نفسى أشوفه "
دمتم فى حفظ الله
 الموضوع : لسه بتدور على حاجة تغيرك ؟ المصدر : مسجد الهدي المحمدي الكاتب: أحلى حياة |
|
