انا كنت فى ضيقة ازاى والخالق كان معايا

10/08/2009

تقول احد الاخوات

اللهم صلى وسلم وبارك على سيدنا محمد وعلى آله وصحبه اجمعين
انا مش عارفة ابدا منين... وكل حاجة فى حياتى حسيت فيها ان ربنا معايا
حياتى اللى تتحسب عليا من بداية التزامى
انا عمرى 20سنة
وسط الفتن اللى كنت غرقانة فيها فوقت وصحيت فجأة بسبب سجدة شعرت فيها بلذة القرب من الله سبحانه وتعالى
وكانت اول مرة فى حياتى اخشع كدة وانا عندى 19سنة
للاسف ضاع منى كتير
البداية كانت فى الامتحانات وانا كنت واحدة عادية جدا بذاكر كويس ادخل
افضى اللى فدماغى فالورقة وخلاص والحمد لله متعودة من صغرى لا اغش ولا اغشش
انا فى حالى ومبعرفش اللى جمبى الا بعد اللجنة ماتخلص
وجيت فيوم مادة حليت فيها كويس وخلصت بس بحب اخد وقتى كله (الساعتين)للاخر واراجع على مهلى
وكان فاضل تلت ساعة فقلت اقوم اخرج وكنت راجعت وخلاص
وكانت اللجنة كلها فاضية وفى اخر المدرج واحدة بس هى انتيمتى وكانت بتراجع هية كمان وبينى وبينها حوالى 7 بنشات
شاورتلها باى بأيدى وكان المراقب قاعد جمبى على بعد نص متر كدة
لقيت رئيسة اللجنة داخلة وبتقولى هاتى ورقتك..... قلتلها ليه حضرتك هوة انا غشيت لا سمح الله
قالتلى أه اتفضلى اطلعى برة
بصيت للمرقب بتاعى قلتله حضرتك قاعد جمبى هوة انا غشيت قال لأة
قلتلها حضرتك حقك تخرجينى لو غشيت من حد او كان معايا حاجة بنقل منها لا سمح الله
وكمان اغش من مين ومفيش غير تلاتة فى مدرج بياخد 500 فرد وكل واحدة منهم بعيدة عنى
قالتلى يللا يبنتى (احنا عايزين نروح)
قلتلهاانا عايزة اراجع مرة اخيرة قالتلى بررررررررررررررررررررة
قلتلها يعنى حضرتك عايزة تخرجينى لمجرد انك عايزة تروحى
قالتلى طب انا هجيبلك اللى يخرجوكى

قعدت مكانى وقلت للمراقب بعد ماخرجت هوة حضرتك انا غشيت
قالى يبنتى معلشى جايز هية متنرفزة من حاجة قالى سايسى امورك واسمعى كلامها وخلاص
قلتله يعنى اللجنة تبقى سايبة من الاول وانا قاعدة ساكتة واللى بيغشوا
مشوشين عالباقى وتيجى تطردنى وانا اصلا معروفة وسط اصحابى انى لا باخد ولا
ادى اى حاجة اثناء الامتحان
اتطرد... دة مش ظلم
لقيت المراقبة الله يمسيها بالخير جاية ومعاها راجل وبيقول فين البنت اللى مزعلة استاذة فلانة ؟
قلتله انا قالى برة قلتله قولى خطأى اللى انا عملته وانا هسلم ورقتى من سكات واخرج
قالى (هوة كدة برة يعنى برررة)
حطيت ورقتى وقعدت وقلتلهم انا عايزة دكتور المادة ييجى وانا اخرج
قالولى احنا هنجيبلك اللى يخرجك
(انا تمسكى كل دة انى مبحبش الظلم والصراحة انا كنت مخلصة وحلة كويس بس
انا لو عديتها وخرجت هتعمل كدة مع غيرى وغيرى عشان تلحق تروح بدرى)
المهم جابولى رئيس اللجنة له من الله ما يستحق دخل شتمنى وشدنى من دراعى وخد ورقتى غصب عنى
اكتر حاجة تعبتنى ان مش من حقه يشدنى من دراعى يلمسنى ليه اصلا؟
انا ساعتها حسيت ان وكيلى ربنا
وقفت قدامه وقلتله كلمة طلعت من كلللللللللل قلبىىىىىىىى
حسبى الله ونعم الوكيل فيا لو انا الظالم وفيكوا لو انتوا الظلمة
خرجت منهارة اتصلت باخويا عشان ييجى ياخدنى لانى رجلى كنت مش حاسة بيها
فلقيت الراجل دة بيقولى هتجيبيلى مين يعنى بتليفونك دة المحافظ انا مستنيه
قلتله انا مش محتاجة اجيبلك محافظ انا ليا رب قادر ياخودلى حقى
قالى انا هعلم على ورقتك
قلتله ربنا معايا انت بقة مين معاك؟
الراجل بصلى ووشه احمر ومشى وشه فالارض

طلعت لدكتور المادة حكيتله قالى ان هوة بيصحح الورق اللى عليه علامة بما يرضى الله مدام مفيش ادله على حالة الغش

وروحت بيتنا وجيت بالليل صليت ركعتين وقعدت ادعى واقول يارب انا راضية بقضاءك
انا مش زعلانة يارب انا عارفة انك معايا
يارب انت حسبى انت وكيلى يارب بينلى الحكمة من اللى حصل
يارب انت اعلم انى مش غشيت يارب انصر الحق
وقعدت ادعى تلت ساعة
فات 5 ايام جالى استدعاء عالبيت انى معمولى محضر فى الكلية وروحت فاليوم
المحدد معايا شهود من اللجنة والمراقب الى كان شايف الموقف من اوله
وحكيت عللى حصل بمايرضى الله وطلبت اعمل شكوى فى الراجل اللى جه شدنى وشتمنى وخلصت وروحت
بعدها بيومين جالى جواب ببرائتى من الموضوع ده وعلى المتخاصمين قبول الامر وفى الاخر اعتذار وتعهد بعدم التعرض ليا

انا عارفه انتوا مليتوا منى بس دى كانت بداية التزامى انى وصلت لدرجة انى عارفه ان ربنا وحده هو اللى ينصرنى
بفضل الله قربت من ربنا والتزمت ولبست زىّ اسلامى بس من غير نقاب
لبست ملحفة
وبقيت اسمع دروس واقرا كتب دينية بس كان كله ضدى
الاهل والصحا وكله ومش كان ليا اصحاب ملتزمين لسة
مكنش فى غير خالتى وهي داعية وكانت دايما بتدعمنى
لحد ما فى يوم اشتد عليا كلام اصحابى واهلى واتخنقات لدرجة انى مش قادرة
اتحمل وكنا فى الشهر المبارك رمضان وجيت فى صلاة قيام الليل وكنت بحب اعمل
جو هدوء عشان اساعد على الخشوع
كنت بقفل النور وافتح التليفزيون على قناة الرحمة واكتم الصوت بس كان
الغرض بس الضوء الاخضر بتاع قناة الرحمة عشان اشوف وانا بقرا فى المصحف
وفى اخر ركعة وانا بدعى قولت يارب هو انا صح وللا غلط
هوة انا لما ابطل الاغانى واسمع قرآنك وابطل تبرج والبس واسع انا كدة بتشدد ولا انا كدة صح يارب
يارب انا معدتش بحب اكلم اصحابى ديما يقولى انت متشددة رغم انى ولا حاجة
بالنسبة لناس ملتزمين كتير يارب انا الصح وللا اصحابى وللا اهلى يارب
الجنة لمين؟
مصاحبة الرسول فالجنة مش للى بيلتزموا بسنته
يارب ساعدنى بينلى انا الصح وللا اصحابى
وانهرت بالبكاء لدرجة انى كنت بعيط زى الطفلة بصوت عالى وقعدت ادعى كتير
واول ماخلصت قعدت استغفر ربنا وفتحت صوت التليفزيون والله والله والله على ما اقول شهيد
لقيت برنامج كان اسمه خايف عليك كان شغال
لقيت الشيخ بيشاور للكاميرا وبيقول( انتى يبنتى انتى صح انتى الصح مش اصحابك اثبتى ولكى الجنة يا اختى من ترك شيئا لله عوضه باحسن منها يا اختى الله يبشرك بالجنة اذا اتبعتى سنة رسوله)
انا وقفت ايه دة الشيخ دة بيرد على بكايا ودعايا
يااااااااااااااااااااااااه يارب
بالسرعة دى
يااااااااااااااااااااااااااااا رحمن يارحيم
وقعدت اعيط واقول اسماء الله الحسنى وانا بعيط الرحمن الرحيم الملك......المجيييييييب

المجييييييييييييييب يامن تجيب المضطر اذا دعااااااااه يا الله يااااااااااااا الله
يا من تجيب المضطر اذا دعاااااااااااه
والشيخ مستمر ويقول( يا اختى بداية الطريق بيبقى فيه اختبار من الله عز وجل اصحابك يرجعوكى لورا قولى لااااااااااا ربى ورسولى احب الىّ )

ربنا جميل اوى وانا بحب ربنا اوى اوى اوى
ورزقنى الله الصحبة الصالحة
وبعد رمضان هدأ الناس من حولى ولكن........
قررت ألبس النقاب
ودى كانت اكبر واحلى خطوة فى حياتى
محدش من اهلى كان موافق نهائى وبابا وافق بالعافية
ولبسته غصب عنهم مع احترامى للجميع
وفاليوم اللى لبسته فيه بعد ما صليت الفجر نمت وطوا ما انا نايمة فى صوت
بنت جميييييييييل اوى عمرى ما سمعت زيه عمالة تقرأ فى اذنى قرآن فى اول
مرة قلقت فيها اتخضيت وقلت اكيد دة حلم
ونمت لقيت نفس الصوت بيكمل قراءة فى اذنى فقلقت وفتحت عينى ملقتش حد الاوضة فاضية زى ما انا كنت سايباها قبل ما انام
وقلقت تالت ونمت ورابع مرة قلقت قمت غسلت وشى عشان افوق ورجعت نمت تانى
وفى كل مرة الصوت الجمييييييييييييييل دة بيقرا فى ودنى لحد ما صحيت الصبح
وقلت الحمد لله الذى هدانى الى النقاب والصحبة الصالحة وطاعة الله والقرب منه

انا طولت عليكوا معلش استحملونى بس انا حبيت افضفض معاكوا بذكريات انا بعتبرها احلى حاجة فى حياتى
وجزاكم الله خيرا وجمعنا فى الفردوس الاعلى
وصلى اللهم وسلم على سيدنا محمد
سبحان الله وبحمده لا اله الا انت استغفرك واتوب اليك

واخيراً تعليق صغير

هو طبعا أكيد ربنا له حكمة في ابتلاء كل عبد بما يناسبه وبما يعلم أنه يطيقه

لكن أنا لو مكانك و رجع بيّ الزمن مكنتش وقفت قدام رئيس اللجنة حتى لا يصل
إلى ما وصل .. بالذات لو رأيت على وجهه علامات غضب أو ما يوحي له أنه شخص
غير سوي أخلاقيًا

أنا حبيت أقول كده مش لكِ .. لكن لأي أخت ممكن تكون مكانكِ وممكن مايكونش
عندها نفس قوتكِ ويقينكِ في الله في اللحظة دي وقد يقدر لها رئيس لجنة غير
مهذب بالمرة ويتطاول أكثر وأكثر

فمن الحكمة ساعتها أنها "تتغافل" و تمتثل صفات عباد الرحمن "وإذا خاطبهم الجاهلون قالوا سلامًا"

الموضوع : انا كنت فى ضيقة ازاى والخالق كان معايا المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

عضو جديد عدد المساهمات : 684

انا كنت فى ضيقة ازاى والخالق كان معايا 354671

نعم كلامك صح
"وإذا خاطبهم الجاهلون قالوا سلامًا"
انا كنت فى ضيقة ازاى والخالق كان معايا 123765

الموضوع : انا كنت فى ضيقة ازاى والخالق كان معايا المصدر : مسجد الهدي المحمدي الكاتب: زهرة المدائن
توقيع العضو/ه :زهرة المدائن

انا كنت فى ضيقة ازاى والخالق كان معايا

انا كنت فى ضيقة ازاى والخالق كان معايا

مواضيع مماثلة

مواضيع مماثلة