عجائب ال50 قرش

يقول أحد الشباب

للخمسين قرش معايا قصص

في يوم كان في مشكلة هتحصل و متوقعة و كان في أذي هيلحق بيا إلا أن يشاء الله في أحب الأماكن لقلبي مسجدي

فقررت اتصدق ب10 جنيه في صندوق المسجد أول لما ادخل لعل ربنا يصرف عني اللى هيحصل

وفي الطريق للمسجد و لأول مرة أشوف واحدة ست قاعدة على الأرض على الرصيف و بتطلب صدقة لأول مرة يكون المشهد ده في التوقيت اللى بروح فيه المسجد

فدورت في الفكة اللى معايا و ربنا وفقنى و ادتها 50 قرش

و روحت المسجد و معرفش حصل إيه اتلهيت عن اني احط ال10 جنية في الصندوق و سبحان الله الموقف عدى على خير بطريقة جميلة و ربنا صرف عنى المشكلة و بعدها تصدقت بالعشرة جنيه بس شكر لله على الخير اللى حصل و افتكرت وقتها ال50 قرش و قولت يا الله احتقرتها و مجاش في بالي انها ممكن تكون سبب تفريج ربنا عني

و من بعدها بحاول اشوف الست دى او اى حد غيرها في الطريق اللى مشيت فيه وقتها و مفيش حد كأنها كانت مبعوتة للغرض ده و بس عشان اديها ال50 قرش



و القصة التانية مع ال50 قرش اني في مرة كنت في مشوار هشتري حاجات ففي اول الطريق و قبل ما اروح حتة لقيت ست عجوزة قاعدة قدام محل اكل و بتقول عايزة ساندويتش

فمشيت و عديتها كام خطوة و بعدين ربنا رجعني تانى ليها و اديتها 50 قرش

وكملت الطريق وروحت اول مكان هشتري منه كتاب مهم جدا فوجئت ان صاحب المكان بيقول ان من كام دقيقة واحد جيه حجز كل النسخ من الكتاب ده زعلت و لسه بحط رجلى على اول السلم عشان اخرج لقيته طلعلى الكتاب و قال انه هيجيب للى عايز الكتب دى نسخ تانية كمان كام يوم بالمرة عشان هو طالب نسخ تاني

كل ده وانا مش في دماغي الخمسين قرش خالص

القصة مخلصتش روحت المكان التاني اللى هشتري منه و هو معروف ان السعر فيه مش بينزل و مفيش فصال و اسعارهم بتكون غالية

المهم اشتريت حاجتى و اديت صاحب المكان الفلوس عدهم تمام لسه بدي ضهري للمكان عشان امشي لقيته مديني 5 جنية من الفلوس وقالى خلاص

يعنى نزلي من المبلغ 5 جنيه و هما معروفين ان مفيش فصال سبحان الله


وكل مرة اقول ياريتني اديتها اكتر من الخمسين قرش


ها مين هيطلع النهارده خمسين قرش صدقة ^-^

ولو زدوتوا فالله يضاعف لمن يشاء