وقدرت تبعد ؟؟؟؟؟!

10/08/2009

قصة موضوعنا انهاردة ..هي إن واحد زميلي جاي بيحكيلي مشكلته وعايز حل ..

بيحكي ويقول :
زيه زي أي حد في سنه ..سن الشباب ..كان عايش فراغ عاطفي ..
بدأ يدور على حاجة يسد بيها الفراغ ده .. بدأ يدخل الشات ويكلم بنات وكده يعني ..
المهم ..في يوم من الايام .. كان معاه مجموعة بنات في الكلية بيعملوا حاجة زي بحث كده مع بعض ..
وفي الفترة دي اتعرف على بنت فيهم وطبعا خد رقم موبايلها علشان موضوع البحث وكده ..
وبدأوا يقربوا من بعض أكتر..وبدأت العلاقة ما بينهم تدخل في نطاق الاعجاب المتبادل ثم الحب ..
في الفترة دي ..هو كان عارف ظروفه وظروف البيت عندهم ..وعارف انه مستحيل يفكر في موضوع الجواز غير بعد 10 سنين مثلا..
بس الشيطان قاله كمل مع البنت دي يا عم وعيشلك معاها يومين .. وكلها سنتين وتخلص الكلية وتسيبوا بعض والموضوع ينتهي ..

وفعلا..استمرت العلاقة بين الاتنين..مقابلات في الجامعه وكلام في الموبايل طول الليل ..والناس كانت بتحلف بيهم وتقول روميو وجوليت ..
لحد ما انتهت الدراسة والكلية .. والولد خلاص عايز يركز في شغله ويشوف مصلحته ويدور على مستقبله..
اتصل بيها وقالها ان العلاقة ما بينهم مينفعش تستمر وان كل
اللي بينهم كانت مجرد نزوات في فترة المراهقة ..وانتي من طريق وانا من
طريق..
وقفل السكة ..وغير رقم موبايله ..
كل ده مش مشكلة ..

المشكلة انه بعدها بكام يوم لقى رقم غريب بيتصل عليه ...ومجرد ما فتح لقى بنت بتعيط عياط هيستييري ..
وطلعت ان هي البنت اللي كان بيحبها ..مش مهم جابت رقمه ازاي ..
المهم هو الكلام اللي قالتهوله ..وده هو اللي انا عمال الموضوع علشانه ..
قالتله البنت وهي مش قادرة تبطل عياط :
وقدرت تبعد ؟؟؟
انا مش مصدقة ؟؟؟
انا عمري ما كنت اتخيل انك ممكن تعيش يوم من غيري ؟؟
ازاي هان عليك كل اللي كان بينا ؟؟؟
فين كل الكلام والمشاعر اللي كانت بينا ؟؟؟
فين كل الوعود ..فين وعدك ان مفيش شئ هيفرقنا غير الموت ؟؟؟
هو ممكن الحب يموت بالسهولة دي ؟؟
ممكن وعوود السنيين تضيع في لحظة ؟؟؟

الشاب بيقولي : انا قولتلها عادي .. وياريت تنسي الموضوع ده ومتتصليش بيا تاني ..
وكلمتها بشدة علشان متقرفنيش كل شوية ..
ولكن كل يوم تتصل ..ومجرد ما فتح تقعد تعيط ومتتكلمش !!

الشاهد من الموضوع ..
هو رسالة بسيطة ولكنها في غاية الاهمية عايز أوجهها لكل بنت ..

متبقيش ساذجة ..
إنتي ممكن تكوني صغيرة في السن ..بس لازم عقلك يكون أكبر وأنضج من كده ..
خصوصاً لما تبقي شايفة الواقع من حواليكي وعارفة كويس نهاية القصة إييييييييييييه !
ليه عايشة الوهم وفاكرة إن قصة الحب بتاعتك شئ تاني ..غير أي قصة حب ؟؟!!
ليه فاكرة إن الولد اللي بتحبيه ده غير أي حد .. وإنه فعلا بيحبك وهيتجوزك..؟؟!
حد يبني حياته ومستقبله على شوية كلام ووعود ؟؟؟؟
إيه اللي يضمنلك إنه صادق ..؟؟؟؟؟

هتقولي انك واثقة فيه ثقة عمياء ..وانه وعدك انه مجرد ما يخلص كلية او يشتغل هيتقدم ..
هقولك يبقى انتي لسه عايشة الوهم !!!!!
ده حتى لو اتقدملك وخطبك ..ايه اللي يضمنلك انه ميسيبكيش في اي لحظة ؟؟؟
هو ايه الشئ اللي بيربطه بيكي اصلا ..؟؟!
مفيش اي شي ..شوية كلام ..
ولو كان خاطب ..شوية دهب ممكن يستغنى عنهم وخلص الموضوع ..

خلص الموضوع بالنسبة ليه ..انما بالنسبة ليكي فالمآساة لسه بتبدي..!!!!
لسه هتبتدي قصة الندم على كل دقيقة ضيعيتها من عمرك معاه !!
لسه هتندمي على مشاعرك وأحساسيك اللي فرطتي فيها معاه !!
لسه هتدوري على حد يسد خانة الفراغ العاطفي اللي خلاص بقت موجودة في حياتك ولازم تتملي !!!
لسه هتقعدي تسألي نفسك هو العيب في مين ؟؟ فيه ولا فيا ولا في الحب ؟؟؟

يا اختي أي شاب في الدنيا معندوش اي مشكلة انه يسيب اي بنت في اي لحظة ..
ده ان مكنش عاقد النية من قبل ما يكلمها أصلاً انه هيسيبها ..
أصله مش خسران حاجة ..
بالعكس ..هو شايف ان اي بنت فرطت في مشاعرها وعواطفها متنفعش تبقى زوجة المستقبل اللي هيأتمنها على بيته بعد كده !

وحتى لو افترضنا ان الموضوع مشي وكمل وتم الزواج ..
والله العظيم عمرك ما هتلاقي ( الزوج الصالح ) من قصة حب !!!
خلي بالك من الكلام الل بين القوسين ..
مفيش واحد ملتزم هيقعد يحب واحدة قبل الجواز علشان يتجوزها جواز مبني عل حب !!!
الحب في الاسلام بيجي بعد الجواز مش قبله !!!

صوني نفسك يا اختي ..
واحتفظي بمشاعرك لزوجك ..
واعرفي ان اللي بيقولك مقدرش أعيش من غيرك وانت روحي وانتي عمري والكلام ده كله ممكن يبيعك في اي وقت ..
وهترجعي تقوليله :

وقدرت تبعد ؟؟؟!!

هيقولك :

آآآآآآآآآآآه !!!!

=========

ربنا يرزق بنات المسلمين اجمعين بالازواج الصالحين ويعفهم ويسترهم ويحفظهم من كل سوء..اللهم امين..

الموضوع : وقدرت تبعد ؟؟؟؟؟! المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة