أنت غريـــب أوووي !!!

10/08/2009

كم واحد مننا سمع الوصف ده...

" أنت غريب أوي! "

؟؟
وممكن تتبعها كده.. ضحكة سخرية ()
أو .. نظرة اشمئزاز ()

غالبا الجملة دي بتتقال لما حد يستعجب منك بتمسكك بحاجة معينة
أو يكونوا عايزين يوصلوا لك أنك كده مزودها و بتخالف اللي كل الناس بيعملوه ومتعودين عليه

ياااااااه

على أد ما الجملة دي قاسية أوي
وبتحسس الإنسان بالوحشة وأنه منبوذ من الناس
وطبعا مفيش حد يحب يستشعر الاحساس ده

لكن مادام احنا في زمن الغربة...فده أمر "طبيعي"
وده من سنن الله الكونية
أن اللي على الحق لازم يكون مكروه و متحارب

وده مايخليهوش أبدا يتضايق أو ييأس لأن دي علامة و بشرى معجلة له في الدنيا لو ثبت وما استسلمش للمغريات اللي حواليه أنه ماشي في الطريق الصح

عايزك تستقبل الجملة دي وأنت مبتسم ومنشرح الصدر
وتردد في نفسك
"اللهم اغفر لقومي فإنهم لا يعلمون"

فمهما كان الناس بيستغربوك .. بس لازم تشعر بالإحساس ده و التنغيص ده عشان تنال شرف الغربة !!

قال رسول الله ‏ ‏صلى الله عليه وسلم:
" ‏ ‏بدأ الإسلام ‏ ‏غريبا ‏ ‏وسيعود كما بدأ غريبا ‏ ‏فطوبى ‏ ‏للغرباء ‏"
صحيح مسلم

يعني لازم نحس بالغربة زي الغربة اللي عاشها الصحابة في بداية الاسلام وهم
عايشين وسط الكفر والفسق حواليهم من كل مكان... فالاسلام عاد دلوقتي ..
فلازم اللي يتمسك به يوصل له شعور الغربة ده

يعني ايه طوبى؟
طوبى ده اسم شجرة في الجنة
وقيل معناها فرحة وقرة عين لهم بإذن الله

وقال رسول الله صلى الله عليه وسلم:
"طوبى للغرباء! ، قيل : و من الغرباء يا رسول الله ؟ قال : ناس صالحون قليل في ناس سوء كثير ، من يعصيهم أكثر ممن يطيعهم"الراوي: عبدالله بن عمرو بن العاص المحدث: الألباني - المصدر:السلسلة الصحيحة - الصفحة أو الرقم: 1619
خلاصة حكم المحدث: صحيح

يا الله
ناس صالحة قليلة .. وسط ناس كتيرة سيئة!!
أكيد دول أخلاقهم غير.. وشكلهم غير.. وحياتهم غير ..عشان الرسول يوصفهم كده

نفهم من الكلام السابق أن اللي ما يحسش بالغربة في زمن الغربة فهو لا شك في صفوف اللاهين

ومن لم يذق طعم الاستنكار من جمهور العاصين فهو لا شك معهم في صفوف اللاعبين

لازم شعور الغربة ده يكون ظاهر عليك في كل حياتك .. وكل تصرفاتك .. في لبسك .. وفي كلامك .. وفي مشيتك

في ركوبك المواصلات .. و وقوفك في الجامعة

لازم تبق غريـــــــــــــب !!

مثلا أنت بتركب المواصلات كل يوم بتشوف الناس راكبة والراجل لازق في الست...
وشايف بنت واقفة وراجل واقف "شبه محاوطها" بايديه
شايف الاختلاط وحجاب البنات اللي كل شكل و لون

هل حسيت ساعتها أنك غريب ؟

ولا كنت بتحس به ولكن خلاص اتعودت عليه وبقى مألوف فنسيته ؟
ولا أصلا لم يمر عليك الاحساس ده قبل كده ؟

هل أنت غريب فعلا ؟؟!!

تدخل الجامعة فتلاق البنات والولاد واقفين كوبلز أو ولدين و بنت أو بنتين و ولد ... أو بنت مع شلة ولاد !!!

في وسط الجو ده .. وأنت داخل وحدك
مش بتحس بالخنقة والضيق ؟
مش بتحس أن الموقف ده بيحسسك أنك غريب في العالم ده؟
ونفسك تعيش في عالم نقي .. زي زمن النبي صلى الله عليه وسلم

لو حسيت به فأبشر !!

اعرض نفسك في كل موقف تمر به وشوف

هل بتلاقي نفسك مع الناس اللاهية الكتيرة .. ولا مع الناس "الغريبة" القليلين ؟

ربنا سبحانه و تعالى قال عن المعذبين في سقر:
"مَا سَلَكَكُمْ فِي سَقَرَ 42 قَالُوا لَمْ نَكُ مِنَ الْمُصَلِّينَ 43 وَلَمْ نَكُ نُطْعِمُ الْمِسْكِينَ 44 وَكُنَّا نَخُوضُ مَعَ الْخَائِضِينَ 45" من سورة المدثر

يعني : لاقيت الناس بيعملوا حاجة فعملتها معاهم!

النبي صلى الله عليه وسلم من 1430 سنة بشّر الغرباء دول اللي في زماننا ولم يخوضوا مع الخائضين ولا كذبوا بيوم الدين وقال:
"طوبي للغرباء"

تحب تكون معاهم ؟

وعايز أوضح أن مش معنى الغربة الشذوذ والخلاف لأجل الخلاف
ومش معنى أن الإنسان غريب أنه يكون معتزل الناس وما بيضحكش وحياته كلها نكد
لكن إحساس الغربة اللي بتكلم عليه.. إحساس جوة ذات الإنسان بيخليه منفصل روحيا عن العالم اللي حواليه
يكون جسده مع الناس و روحه تحلق في السماء حول عرش الرحمن
الناس بتوزن الأمور بميزان الماديات والمظاهر والدنيا
وهي بتقول في نفسها: يا ترى الأمر ده يرضيك يا رب؟

الموضوع ده هدفه أننا نثبّت ونصبّر ونشد أزر بعض في زماننا ده
زمن الغربة

سيدنا موسى عليه السلام كان من الدعوات اللي دعا ربنا بها لما ربنا كلفه بالرسالة:
"وَاجْعَل لِّي وَزِيرًا مِّنْ أَهْلِي 29 هَارُونَ أَخِي 30 اشْدُدْ بِهِ أَزْرِي31 وَأَشْرِكْهُ فِي أَمْرِي 32 كَيْ نُسَبِّحَكَ كَثِيرًا 33 وَنَذْكُرَكَ كَثِيرًا 34 إِنَّكَ كُنتَ بِنَا بَصِيرًا 35"من سورة طه

عارف أن الإنسان و هو وحيد بيبقى ضعيف فمحتاج حد يثبته و يشد أزره و يواسيه ويقوله هانت كلها كم يوم وندخل الجنة!

وكان في مقولة بتقول:
المرء قليل بنفسه... كثير بإخوانه

النبي صلى الله عليه وسلم قال:
"ما من ثلاثة في قرية و لا بدو ، لا تقام فيهم الصلاة ، إلا قد استحوذ عليهم الشيطان ، فعليكم بالجماعة ؛ فإنما يأكل الذئب من الغنم القاصية"
الراوي: أبو الدرداء المحدث: الألباني - المصدر: صحيح الترغيب - الصفحة أو الرقم: 427
خلاصة حكم المحدث: حسن صحيح

يعني زي الذئب لما بيجي يختار فريسته من قطيع غنم مش هيدخل وسط القطيع لأنه كده بيعرض نفسه للخطر والهلاك
لكن بياخد الشاة البعيدة الوحيدة الشاردة عن القطيع

فكذلك الشيطان مش بيستقوى إلا على الوحيد المنعزل !!

فاحنا هنا بإذن الله عايزين نستمتع
بشعور الغربة ده ونصبر بعض على قرف الدنيا و همها و نفكر بعض بالتمسك بسنة
الرسول صلى الله عليه وسلم... لحد ما نتقابل في الجنة بإذن الله.

"وَأَقْبَلَ بَعْضُهُمْ عَلَى بَعْضٍ يَتَسَاءلُونَ 25 قَالُوا إِنَّا كُنَّا قَبْلُ فِي أَهْلِنَا مُشْفِقِينَ 26 فَمَنَّ اللَّهُ عَلَيْنَا وَوَقَانَا عَذَابَ السَّمُومِ 27 إِنَّا كُنَّا مِن قَبْلُ نَدْعُوهُ إِنَّهُ هُوَ الْبَرُّ الرَّحِيمُ 28" من سورة الطور

الموضوع : أنت غريـــب أوووي !!! المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

أنت غريـــب أوووي !!!

أنت غريـــب أوووي !!!

مواضيع مماثلة

مواضيع مماثلة