الحق نفسك قبل المدفع ما يضرب

10/08/2009

طبعا كلنا داخلين على رمضان بإذن الله وكل عام وأنتم بخير ..

وعارفين كلنا الجمله المشهورة اللي بتتقال في رمضان ..
اقولها ولا فاكرينها ..
طيب صلوا عالنبي .. صلى الله عليه وسلم ..

تلاقي الناس كلها كل ما حد يكلمهم يتنرفز عليك ويقول لك يعم سيبه في حاله أصله صايم ..
تصدق أنا مكنتش عارف إنه صايم !!!

وكأن الصيام ده حاجه بتشيط الأعصاب .. بيبوظ الاخلاق .. بيتسبب في سوء المعاملات .. عياذا بالله !!!

وطبعا ده كلام ميطلعش من حد بيفهم أبدا ..

الحق نفسك قبل المدفع ما يضرب 318653

عاوزين من دلوقتي نبدأ نتدرب على الصيام ..
ومع التدرب على الصيام نحاول نحسن من أخلاقنا شويه ..
اللي بيتعصب بسرعه يبدأ يكظم غيظه شويه ..
وياخد الهدية دي من النبي صلى الله عليه وسلم ..
قال صلى الله عليه وسلم : " و من كظم غيظا و لو شاء أن يمضيه أمضاه ملأ الله قلبه رضى يوم القيامة "
[ رواه ابن أبي الدنيا وحسنه الألباني ]

يعني لما واحد زي حالاتي ينرفزك .. قول له متستاهلش أطلع زهقي فيك .. أنا عاوز ربنا يرضيني يوم القيامة ..
وتقول .. اللهم اخزيك يا شيطان يا وحش .. وتعد كده جمب حيطة على جمب كده ..
لوحدك خالص .. وتعد تستغفر من ذنوبك اللي بتخليك تتنرفز على الدنيا كلها
كده ..

الحق نفسك قبل المدفع ما يضرب 318653

يبقى لازم نستعد لرمضان بجد من دلوقتي ونجهز شنطة رمضان ..
بس مش شنطة فيها بلح وتمر هندي وقمر الدين وياميش وكنافه وبسبوسه وأم علي وأنا جوعت .. الله يسامحكم ..

لا مش دي الشنطة اللي هنجهزها ..
احنا هنجهز شنطة تانيه خااااالص ..

اسمها عدة رمضان ..
ربنا عزوجل قال ( ولو أرادوا الخروج لأعدوا له عدة ) ..
يعني اللي ناوي يصوم صيام مظبوط ربنا يتقبله منه .. هيبدأ يستعد له قبل ما ييجي ..
اشمعنى الامتحان بنذاكر له قبلها بشهر ولا حاجه ..

قولنا قبل كده في الموضوع ده ..
(((ياخبر أبيض )))

إننا لازم نوازن بين استعدادنا للدنيا واستعدادنا للآخرة ..
وده ميزان الصادقين وعلامتهم .. إنه استعداده لآخرته دايما هو الاول وهو اللي مستحوذ على كل تفكيره ..
ياترى احنا مستعدين ؟؟
طيب بنفكر نستعد ؟؟
طيب هنفكر إمتى ؟؟
لما العيد ييجي ؟؟

طبعا كلنا فاكرين رمضان اللي فات واللي قبله واللي قبله و..... إلخ ..
آخر يوم أعدنا نبكي ونعيط على رمضان .. وهيمشي واحنا مشبعناش منه ..
يارب يبقى 30 يوم .. ده كله عشان نغطي على تقصيرنا طول لشهر ..
والنوم اللي نمناه وقت التهجد .. وعدم الانتظام في ورد القرآن .. بل تضييع الصلوت أيانا بسبب المطبخ وتجهيز الفطار والسحور ..
وقلبنا المقصد من رمضان .. بدل ما نقلل من الأكل فيه .. لا فتحنا معلف ( sorry)

وده سببه قلة الاستعداد لرمضان ..
يبقى من دلوقتي نبدأ نجهز عدة رمضان ..
مين هيجهز معانا ؟؟
اللي هيجهز معانا يروح يشتري شنطه

طيب ادام دبست نفسك يا فالح يبقى لازم تنفذ الكلام اللي جاي ده .. وإجباري ..

الحق نفسك قبل المدفع ما يضرب 383808

هنجمع في الشنطة
..
1- التوبة بجد مش هزار من كل الذنوب ..
والموضوع ده يساعدك بإذن الله
وآدي لي سنين على دا الحال بقاسي المر والأوزار !!

2- تجديد التوبة من الذنوب اللي سيبناها من فترة
ونسينا نتوب منها أصلا .. او توبنا والتوبة قدمت شويتين .. فنجدد التوبة .. بكثرة الندم والبكاء والاستغفار منها ..
غفر الله لي ولكم ..

3- المحافظة على الصلوات الخمس في جماعه ( قدر الإمكااااااااان) وصلاة الفجر يا جمااااااااااااعه ..
ونبدأ نحافظ على السنن كمان .. وصلاة الضحى وصلاة الوتر .. وصلاة ركعتين
بعد العشا بنية قيام الليل لو مش هتقدر تصحى بالليل أو هتكسل تصليهم قبل ما
تنام ..

4- المحافظة على اذكار الصباح والمساء ..
وأذكار ختام الصلاة .. والأذكار اليومية عموما .. ( كتيب حصن المسلم يفيدك كتير جدا .. لازم تشتريه من أي مكتبه وميفارقش جيبك أبدا )..

5- طبعا ... نثبت ورد دعاء يوميا وبالذات في الايام اللي هنصومها ..
عشان نتعلم الدعاء وعلى ما ييجي شهر رمضان نكون ادمننا الدعاء فميفوتناش ولا يوم وبإذن الله كل أحلامنا تتحقق ..

6- ورد قراءة القرآن
هنبدأ فيه بالتدريج لو في ناس مش ليها ورد ومهمله مع القرآن حبتين تلاته ..
نبدأ بصفحة يوميا .. ونزود كل يوم ولو آيه واحده عن اليوم اللي قبله ..
على ما ييجي رمضان بإذن الله نكون وصلنا لجزء يوميا بإذن الله ..
ونحاول نقرأ تفسير مبسط ( تفسير السعدي مثلا) عشان يعيننا على التدبر .. مش
أبقى واقف ورا الإمام وهو بيقرأ والناس بتبكي وأنا أكني في دنيا تانيه ..
يبقى قراءة كتاب تفسير كل يوم بعض الآيات .. متثقلش على نفسك ..

7- الاخلاق يا جماعه .. الاخلاااااااااااق ..
نحسن من معاملاتنا مع الناس شويه .. ونحاول نتعلم الادب مع الأب والام
بالذات .. وطريقة الكلام والمعاملة .. حاسب من دعواتهم عليك .. خاف أوي ..

8- إدمان الاستغفار في اوقات الفراغ ..
والكلمة أقصدها بالمعنى الحرفي .. عاوزين نكون مدمنين استغفار ..

9- حاول تتعود عالصدقة ..
ولو جزء بسيط أسبوعيا مش يوميا .. لحد ما تتعود عليها وعلى رمضان ما يشرفنا تكون بقيت منفق .. ربنا يتقبل يااااااارب ..

10- يلا وروني مقترحاتكم هو أنا هدني أتكلم كتير كده
والأعمال اللي نقدر نتعود عليها من دلوقتي لحد ما الشهر الكريم ينورنا ..
متبخلوش علينا بأفكاركم يمكن حد يطبقها وتاخدوا مثل أجره ..

اللهم بارك لنا في شعبان وبلغنا رمضان ..

وربنا يرزقنا وإياكم أحلى حياة في طاعة الله

أستودعكم الله .. والسلام عليكم ورحمة الله وبركاته ..

تقبل الله منا ومنكم صالح الأعمال ..

الموضوع : الحق نفسك قبل المدفع ما يضرب المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

26/06/2010

الحق نفسك قبل المدفع ما يضرب Www.almsloob.com-3a9365db96

الموضوع : الحق نفسك قبل المدفع ما يضرب المصدر : مسجد الهدي المحمدي الكاتب: مشتاقة للجنة
توقيع العضو/ه :مشتاقة للجنة

10/08/2009

جزانا واياكم خير الجزاء

الموضوع : الحق نفسك قبل المدفع ما يضرب المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

عضو جديد عدد المساهمات : 1

جزاك الله خيرا

الموضوع : الحق نفسك قبل المدفع ما يضرب المصدر : مسجد الهدي المحمدي الكاتب: mahmoudalkomy
توقيع العضو/ه :mahmoudalkomy

10/08/2009

جزانا واياكم خير الجزاء

الموضوع : الحق نفسك قبل المدفع ما يضرب المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

الحق نفسك قبل المدفع ما يضرب

الحق نفسك قبل المدفع ما يضرب

مواضيع مماثلة

مواضيع مماثلة