لفظ جديد أو مش هنقول جديد لكن بدأ يظهر كثيرا في الساحة دلوقتي

تعالوا نجدد في الدين !!

اللفظ كلفظ فهو لفظ صحيح

و قاله النبي صلى الله عليه وسلم :

( إِنَّ اللَّهَ يَبْعَثُ لِهَذِهِ الْأُمَّةِ عَلَى رَأْسِ كُلِّ مِائَةِ سَنَةٍ مَنْ يُجَدِّدُ لَهَا دِينَهَا )


حديث صحيح

السؤال اللي أي حد هيسأله

هو انتو مش لما بنعمل حاجة جديدة مش موجودة يعني في الدين بتقولولنا انها بدعة

طيب ما التجديد موجود أهو بالعكس دا النبي صلى الله عليه وسلم مدح فيهم !!!

تعالوا نشوف الإشكالية و الألفاظ دي ممكن يتلعب بيها إزاي !



يعني ايه تجديد و ايه الفرق بينه و بين البدعة و ايع علاقة المتفلسفون بالموضوع ؟؟؟

في حديث للنبي صلى الله عليه وسلم ممكن نكون سمعناه كتير جدا بس ما ركزناش فيه

قال الرسول صلى الله عليه وسلم جددوا إيمانكم،

* قيل: يا رسول الله وكيف نجدد إيماننا؟

قال: أكثروا من لا إله إلا الله

رواه أحمد

النبي صلى الله عليه وسلم هنا أمرنا أن نجدد إيماننا

فلما سألواه إزاي

قالهم قولوا كتير لا إله إلا الله

هل دا معناه ان الناس مكانتش بتقول لا إله إلا الله قبل ما يأمرهم النبي بتجديد الإيمان

بالعكس دا أول ركن من أركان الإسلام الشهادة

طيب مثال تاني

كتير بنسمع لفظ جدد وضوءك

هل دا معناه انك بتقول اتوضأ بس بطريقة جديدة ؟؟

لأ انت بتأمره انه يجدد يعني ييعيده على صورته الأصلية مرة أخرى

زي ما النبي صلى الله عليه وسلم أمرهم بتجديد الإيمان بذكر الله لأنه بيزيل الران و الصدأ من على القلب

يعني وصلنا لأن التجديد هنا المقصود بيه : اني أرجع الشيء على صورته الأصلية

نرجع للحديث اللي كتير من الناس مش فاهماه أو بتاخدوا حجة انها تعمل حاجات مش في الدين على سبيل التجديد

ركزوا في الحديث كدا :

( إِنَّ اللَّهَ يَبْعَثُ لِهَذِهِ الْأُمَّةِ عَلَى رَأْسِ كُلِّ مِائَةِ سَنَةٍ مَنْ يُجَدِّدُ لَهَا دِينَهَا )

النبي صلى الله عليه وسلم لم يقل يجدد لها دينها

بمعنى ان الدين هو اللي هيتجدد

لأ دا دين الأمة

أي ايمانها و أعمالها

يعني يدلهم على الخير و ينكر الشر

يعني يرجعوا الأمة لما كانت عليه من الخيرية و الصلاح

يعني يرجعوا الناس للإسلام الصافي الصحيح من غير إضافات أو تعديلات أو بدع

و ليس المقصود أن تعاليم الدين هي اللي هتتجدد

يعني أهم حاجة طلعنا بيها ان التجديد هو أننا نرجع الأمر على أصله بعد ما كثر فيه الانحرافات أو البدع

و للتوضيح أكتر ممكن تقرأ شرح اللجنة الدائمة لأمر التجديد :





طيب يعني ايه بدعة !

البدعة هو اننا نستحدث شيء في الدين مكانش موجود

طيب هو مش في حديث بيقول :

"من دعا إلى هدى كان
له من الأجر مثل أجور من تبعه لا ينقص ذلك من أجورهم شيئاً، ومن دعا إلى
ضلالة كان عليه من الإثم مثل آثام من تبعه لا ينقص ذلك من آثامهم شيئاً".

صحيح مسلم



يعني أنا ممكن أجمع الناس على حاجة حلوة و جديدة و عبادة برضه و كلنا نعمل الخير دا

ليه بتقولولنا بدعة !

هنرد ع الموضوع دا بحديث النبي صلى الله عليه وسلم :

من
أحيا سنة من سنتي فعمل بها الناس كان له مثل أجر من عمل بها لا ينقص من
أجورهم شيئا ومن ابتدع بدعة فعمل بها كان عليه أوزار من عمل بها لا ينقص من
أوزار من عمل بها شيئا

صححه الألباني

النبي صلى الله عليه وسلم بيقول سنة من سنتي

يعني النبي صلى الله عليه وسلم اشترط
أن يكون العمل دا من سنته هو اللي انت هتاخد بيها أجر و تدعو ليها و
بالتالي هتاخد أجور من عمل بها

أما ان كانت حاجة لم ترد عن النبي صلى الله عليه وسلم فلازم تبعد عنها لأنها بدعة و البدعة تزيد العبد بعدا لا قربا من الله عز و جل

مثال تاني للتوضيح

الملك قال :

وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا

هل انت تقدر تحيي نفس؟؟

أبدا الخلق بيد الله يعني انت ما ينفعش
تحيي نفس من عدم بل هي نفس موجودة بس انت ممكن تنقذها من الموت و كذلك
الأعمال هي موجودة بس لعل الناس نسيتها أو السنة الناس هجرتها فأنت تحييها
هكذا

يعني وصلنا برضه لأن مفيش حاجة اسمها أألف عبادة و أقول انا بحيي سنة و ضربنا مثل بموضوع الإحياء





أمال مين المتفلسفون دول !!!

دول ناس كتير للأسف موجودين و الإعلام سلط الضوء عليهم

و دول اللي بيقولوا يا عم سيبك من موضوع حدثنا " يقصد سنة النبي صلى الله عليه وسلم "

و شغل مخك شوية !!

الواحد مش لازم يلغي عقله

طبعا صح الواحد مش لازم يلغي عقله

بل ربنا دعانا لأن نعرفه بعقلنا

في أصل مهم لازم كلنا نكون عارفينه

مين خلقك ؟؟

الله

و من خلق عقلك ؟؟

الله

طيب و اللي خلقك مش هو اللي أنزل القرآن و علم النبي صلى الله عليه وسلم ؟؟

أكيد

و هو هو ربنا اللي خلق عقلك و الكون اللي انت ماشي بيه بعقلك ؟؟

أكيد

و هو اللي قال : ألا يعلم من خلق و هو اللطيف الخبير

أكيد

إذن الله لن يشرع شيء يخالف عقلك أبدا

أن اللي أنزل القرآن و بعث النبي صلى الله عليه وسلم هو اللي خلق عقلك

يبقى لا يمكن أن يتعارض عقلك مع دينك أبدا إلا:

1- أن يكون
انت فهمت النص غلط : يعني فهمت آية أو حديث غلط لذلك الناس لما تقول نرجع
نشوف النبي صلى الله عليه وسلم و الصحابة فهموا الحديث و القرآن إزاي دا مش
معناه اننا بنقولك إلغي عقلك ! أبدا احنا بنرجع عقلك للفهم الصحيح و
ساعتها فعلا هتلاقي الكلام ماشي على فطرتك و مع عقلك

2- أن يكون النص مش صحيح زي الأحاديث المكذوبة و الموضوعة

ساعتها هتحس انها مش راكبة على عقلك

يبقى ردنا على المتفلسفون دول ان عمر ما ربنا هينزل شيء يتعارض مع عقلنا لأنه الخالق هو المشرع لدينه و الاتنين مصدرهم واحد !



خلاصة الكلام :

1- التجديد : هو أن نعيد الشيء على أصله الصافي

يعني الإسلام كما أُنزل من غير تحريفات و لا ابتداعات

2- البدعة : ان تستحدث شيء لم يرد عن النبي صلى الله عليه وسلم كعبادة و تقول ياللا نعمل عبادة جديدة

3- عمر ما
ديننا هيتعارض مع عقولنا لذلك ان حصل تعارض انا هقدم ديني على عقلي لسبب
خالق عقلي هو مشرع ديني و أكيد ان تعار العقل مع الدين يبقى إما أني فاهم
غلط أو أتأكد من مصدر المعلومة الدينية اللي ان تعارضت مع عقلي و فطرتي و
أكيد مش صح





حد فهم حاجه ؟؟؟

نسأل الله أن يردنا إلى ديننا ردا جميلا