سلام عليكم ورحمه الله وبركاته
نبدأ
بســــم الله
الدرس الثانى
الدرس اللى فات عرفنا الطهاره و اتكلمنا فى فضل الطهاره
وقلنا ان الطهاره بتكون بالماء - فى حالة الوضوء او الغسل -
او بالتراب - فى حالة التيمم
طيب هل أى ماء نقدر نتطهر بيه ؟؟؟
الاول قبل ما نرد على السؤال ده ونعرف امتى الميه تنفع نتطهر بيها وامتى لا
عاوزين نعرف ايه هيه انواع المياه اللى ممكن نتطهر بيها
*******************************
أنـــــــــــواع الميــــــــــــــاه
**********
انواع المياه بحسب مصادرها - يعنى بتجيلنا منين - :
ماء المطر
ماء البحر
ماء النهر
ماء البئر
ماء الثلج والبرد
طيب ايه الدليل على ان انواع المياه دى كلها تصلح اننا نتطهر بيها ؟؟؟؟
تعالو نمسك نوع نوع من انواع المياه دى ونشوف دليل طهوريته
أولا / مـــــــــــاء المطــــــر :
طبعا ماء المطر طهور
والدليل :
قال تعالى: " وأنزلنا من السماء ماءا طهورا "
فى الاية الكريمة قال تعالى انزلنا من السماء ماء .... اللى هو المطر
ثم وصف الله عز وجل الماء فقال طهورا
وعاوزين نوضح كمان ان فى فرق بين طاهر و طهور
طاهر : قد يكون طاهر فى نفسه ولكن غير مطهر لغيره - يعنى مينفعش نغتسل بيه او نتوضأ بيه -
طهور : طاهر فى نفسه ومطهر لغيره - يعنى ينفع نغتسل ونتوضأ بيه -
وبأذن الله حنفهم المعنى ده اكتر بالامثله فى الدروس القادمه
ثانيا / مـــــــــــاء البحــــــر :
ماء البحر أيضا طهور
والدليل :
قول النبي صلى الله عليه للصحابي الذي قال له :
" إنا نركب البحر - أي يذهبون في رحلات فيكون معهم ماء إما أن يتوضؤوا منه أو يشربوا منه -
فقال له النبي صلى الله عليه وسلم :
"هو الطهور ماءه ، الحل ميتته".
النبى صلى الله عليه وسلم يقصد فى الحديث ... البحر
وقال عنه انه ماءه طهور و ميتته حلال - يعنى الحاجات اللى بنصطادها منه حلال للاكل -
ثالثا / مـــــــــــاء النهــــــر :
طيب ماء النهر برده طهور طبعا
لكن دليل طهوريته بقى حلو جدا
فى حديث الرسول صلى الله عليه وسلم بيشبه فيه الصلوات الخمس اللى بتطهرنا من ذنوبنا بالنهر اللى بنغتسل منه ويطهر جسدنا
والشاهد من الحديث ان لما الرسول صلى الله عليه وسلم يشبه الصلوات بالنهر فده يدل على ان النهر طهور طبعا
والحديث :
عن أبي هريرة أن رسول الله صلى الله عليه وسلم قال :
" أرأيتم لو أن نهرا بباب أحدكم يغتسل منه كل يوم خمس مرات هل يبقى من درنه شيء ، قالوا : لا يبقى من درنه شيء ، قال : فذلك مثل الصلوات الخمس يمحو الله بهن الخطايا "..
رابعا / مـــــــــــاء البئــــــر :
كمان ماء البئر طهور وممكن نتطهر بيه
والدليل :
حديث النبي صلى الله عليه وسلم :
عن أبي سعيد الخدري قال : قيل :
يا رسول الله أنتوضأ من بئر بضاعة وهي بئر يلقى فيها الحيض ولحوم الكلاب والنتن ؟،
فقال رسول الله صلى الله عليه و سلم :
" إن الماء طهور لا يُنجسه شيء".
خامســا / مـــــــــــاء الثلج و البرد :
اولا الثلج عارفينه
البرد بقى بفتح الباء والراء تعني : قطع الثلج الصغير الذي ينزل مع المطر الشديد
طيب الماء الناتج عن الثلج والبرد برده طهور
والدليل برده حلو اوى
الدليل موجود فى دعاء استفتاح الصلاه
عن أبى هريرة قال : " كان رسول الله صلى الله عليه وآله وسلم إذا كبر في الصلاة سكت هنية قبل أن يقرأ فقلت :
يا رسول الله بابى أنت وأمي أرأيت سكوتك بين التكبير والقراءة ما تقول ؟ ،
قال :
أقول اللهم باعد بيني وبين خطاياى كما باعدت بين المشرق والمغرب اللهم نقني من خطاياي كما ينقى الثوب الابيض من الدنس اللهم اغسلني من خطاياى بالثلج والماء والبرد "
كده الحمد لله خلصنا انواع المياه
نكمل المره القادمه بأذن الله
الموضوع : فقة المراة المسلمة 2 المصدر : مسجد الهدي المحمدي الكاتب: aya
موضوع: فقة المراة المسلمة 2 
الإثنين 20 فبراير 2012, 6:21 pm
