أحلى حياةمدير عام المنتدى
تاريخ التسجيل : 10/08/2009
 |  موضوع: هل انت من النظام السابق ؟  الإثنين 14 مارس 2011, 5:02 pm | |
| 
مصر الحبيبة بلدك وبلدى
مصر الحبيبة أرضك وأرضى
بفضل الله تعالى مصر اجتازت فترة عصيبة وكسرت حاجز كبير
بفضل الله سبحانه وتعالى على شبابها وأولادها
دماء أسيلت غدرا
أرواح أزهقت ظلما
لكن الظلم كان لا بد أنه يكون له نهاية
انتهى وبدأت صفحة جديدة وإن كنا لازلنا فى منتصف الطريق
لكن اللى لسه منتهاش
دورنا فى بناء مجتمعنا , مجتمع متماسك تعلوه القيم والمبادئ والأخلاق اللى منبعها ديننا الحنيف
فتعالوا نبدأ العمل
قال شيخ الإسلام ابن تيمية رحمه الله : " وأهل السنة هم أعلم الناس بالحق وأنفعهم للخلق "
ياترى أنت نافع فى مجتمعك ؟!
بتقدر تؤدى وتنتج ولا الدنيا اتغيرت حواليك وأنت لسه ما اتغيرتش ؟!
شفنا الشباب بيبنى وبيعمر وبينضف الشوارع وبيشيل الزبالة
وشباب تانين بيشتروا الحاجات اللى كانت ناقصة فى السوق وبتتباع بأسعار غالية وبيبعوها للناس بسعر الجملة
وشباب فى عز الليل بتحرس الحى بتاعها من أيادى البلطجية
كانت بشرى طيبة إن الخير لسه فى قلوب شبابنا
وكان درس لازم نتعلم منه ويبقى صفة حلوة من صفاتنا اللى بنعمل بيها ونعلمها للأجيال من بعدنا
نعلمهم قول النبى صلى الله عليه وسلم : " مثل المؤمنين فى توادهم وتراحمهم كالجسد الواحد إذا اشتكى من عضو تداعى له سائر الجسد بالسهر والحمى "
وقول النبى صلى الله عليه وسلم: " المؤمن للمؤمن كالبنيان يشد بعضه بعضا " وشبك أصابعه صلى الله عليه وسلم
قبل ما نقول إحنا هنعمل إيه لازم ننبه على حاجة مهمة جدا جدا وهى إخلاص النية لله سبحانه
فإصلاحنا لمجتمعنا مش لمجرد الإصلاح
ده لازم ننوى إننا هنعمل كده لوجه الله تعالى وتعبدا له سبحانه وتعالى
طب وايه دخل العبادة فى الإصلاح ؟!!
خطأ إننا نظن إن فيه شئ حياتنا ممكن نعمله وميكونش خالص لله سبحانه وتعالى
فأى شئ لازم يكون غرضنا من عمله هو رضا الله سبحانه وتعالى والتقرب له والتعبد له بهذا العمل
لأننا أصلا موجودين على الأرض دى لشئ واحد وهو عبادة الله سبحانه وتعالى
قال الله تعالى : " وَمَا خَلَقْتُ الْجِنّ وَالإِنسَ إِلاّ لِيَعْبُدُونِ "
فكل حاجة هنعملها ما هى إلا سبب ووسيلة لكى نصل إلى تلك الغاية ولازم نخلص النية فيها لله تعالى وإلا هتضيع هباءا منثورا
ودين الله إنما وضع فى الأرض ليصلح كل شئون البشر
قال نبى الله شعيب عليه السلام لقومه كما حكى القرءان عنه : "إِنْ أُرِيدُ إِلاّ الإِصْلاَحَ مَا اسْتَطَعْتُ وَمَا تَوْفِيقِيَ إِلاّ بِاللّهِ عَلَيْهِ تَوَكّلْتُ وَإِلَيْهِ أُنِيبُ "
فخطأ برده إننا نتصور إن الدين مكانه الجوامع وبس !
فالإصلاح منبعه الدين مش علشان أنا مصرى ولو سافرت بره مصر ولا غيرت جنسيتى هابقى حاجة تانية
لما كل واحد فينا ينصبغ بصبغة الدين هيبقى صالح فى ذاته ومصلح لغيره فى أى مكان يبقى فيه
لوحده أو مع غيره برا مصر أو جوه مصر
تبقى دى طبيعتك
ومتنتظرش أو تستنى كلمة شكر أو تقدير من حد أو إنهم يعملوا لك تمثال
واحتسب أجرك عند ربنا سبحانه وتعالى لأنك بتعمل كده علشان رضاه عنك
واللى خلانا قلنا مصر فى عنوان الموضوع إن لها واجب علينا فى الفترة دى بيحتمه علينا ديننا اللى بننتمى له
ابدأ بنفســك
أنا وأنت وحدة بناء المجتمع ده , كل واحد مننا جزء منه فعلشان نصلحه يبقى لازم كل واحد فينا يتصلح يبقى لازم تبدأ بنفســـك
أحد الكتاب قال : يمكن للفرد أن يصلح المجتمع كله إذا أصلح واحد متر مربع من حوله ( يقصد إذا أصلح نفسه )
فهنبدأ ننظر فى السلبيات اللى كانت فينا , الحاجات اللى كنا بنعملها وبنقول الناس كلها كده ويعنى هوا أنا الى هأغير الكون
كان مننا اللى بيدفع رشوة !!
علشان يمشى أموره محسوبية وفهلوة !!
ما هو كان مضطر والناس كلها بتعمل كده والعملية خربانة من فوق
ده الكلام اللى كنا بنسمعه
طب اللى فوق خلاص ودلوقت دورى ودورك وزى ما اتفقنا بقت بلدك وبلدى
ولازمنا وقفة علشان نتصدى للجريمة دى ونقف فى وش البلطجية اللى بياخدوها مننا لوى دراع ومش هيمشى مصلحتى إلا لما يقبض
ومهما سماها الناس اسمها فى الأول والآخر رشوة ولعن الله الراشى والمرتشى كما قال سيد الخلق صلى الله عليه وسلم
وكان مننا اللى بيسرق !!
آه مش شرط يكون حط ايده فى جيوب الناس
لأ ده كان بيزوغ فى القطر من الكمثرى وكان بيركب باشتراك صاحبه
أو كان سواق وبيستغل الظروف ويزود الأجرة
أو كان بيبنى بيته وأخذ متر من الشارع
كان فينا اللى بيخون ويكذب ويغش !!
اللى بيخون أمانته ويروح شغله متأخر أو يخلع بدرى
ولا اللى يخلى يمضى بداله حضور وإنصراف وميروحش أصلا
أو يوقع شهادة أو أى وثيقة زورا خدمة لصاحبها
واللى بيشهد زور واللى بيغش أو يغشش فى الإمتحانات
واللى بيغش زباينه أيا كان
حاجات كتير أشكال وألوان
كانت فينا سلوكيات وحشة كتير !!
معاكسات .... ألفاظ بذيئة
رمى الزبالة فى الشوارع
أنانية وحب ذات
التدخيـــــــن ونسبته الفظيعة فى العالم الإسلامى
الطمع
العبثية والفوضى والإستهتار
سوء الأدب وعدم إحترام الكبار
عدم الحفاظ على الممتلكات العامة وسوء استخدامها
..........
والقائمة تطووووووووول
فالكم الرهيب من السلبيات اللى كانت فينا واللى نابعة أصلا من قلة الدين
والتفريط فى حق رب العالمين كانت سبب إننا نتأخر ونتأخر ويحكم علينا
الظلمة والمفسدين وأعمالكم عمالكم
فتعالوا نبدأ وكل واحد يصلح نفسه ويهذبها وينقيها من السلبيات اللى كلنا بنرفضها
ومنسمحش لحد إنه يفرضها علينا لإننا لو عملنا كده يبقى بنعيد سلسلة الفساد من تانى وكأننا معملناش حاجة
بس ياترى هنهتم بنفسنا وبس ؟!!
خليــك إيجـابى
دورنا تجاه المجتمع مش هيكون على المستوى الفردى وبس
مش كفاية تكون كويس وخلاص
ايه الفايدة لما تشوف واحد بيغلط وتسكت ؟!
قال رسول الله صلى الله عليه وسلم : " من رأى منكم منكرا فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان "
وقال صلى الله عليه وسلم : " الدين النصيحة "
طب ما هو ممكن يزعل منى ؟!
خليك مرن وذكى وفكر فى طريقة توصل بيها من غير ما تزعله منك
خلى الإبتسامة على وشك مفتاح لقلوب الناس
وكلامك الطيب الهادئ كقطرات الندى تنزل على قلبه وتنبت فيه الخير والصلاح والتقوى
وشباب كتير رجعوا حاجات اتسرقت بكلمات بسيطة ذكروا الناس بالله فسلموا الحاجات اللى سرقوها
طب ما هو ممكن يحرجنى ويقولى أنت مالك ؟!
حسسه إن قلبك عليه وإن مصلحتكم واحدة
حسسه إن ده حقه عليك
خد بايده وإلا هتغرق السفينة كلها كما قال نبى صلى الله عليه وسلم : " مثل
القائم على حدود الله والواقع فيها ، كمثل قوم استهموا على سفينة ، فأصاب
بعضهم أعلاها وبعضهم أسفلها ، فكان الذين في أسفلها إذا استقوا من الماء
مروا على من فوقهم ، فقالوا : لو أنا خرقنا في نصيبنا خرقا ، ولم نؤذ من
فوقنا ، فإن يتركوهم وما أرادوا هلكوا جميعا ، وإن أخذوا على أيديهم نجوا
ونجوا جميعا "
صحيح البخارى
ولو مفيش فايدة !!
تبقى عملت اللى عليك واحتسب أجرك عند الله تعالى
وادعيله ,,, أصل أنت قلبك عليه
وأوعى تيأس " إِنّهُ لاَ يَيْأَسُ مِن رّوْحِ اللّهِ إِلاّ الْقَوْمُ الْكَافِرُونَ "
خليك إيجابى ونافع فى مكانك ومؤثر فى بيئتك
وتعالوا نرفع شعار " رحماء بينهم "
يااااااه لو المجتمع بتاعنا بقت دى صفته كما كان أصحاب النبى صلى الله عليه وسلم
" مّحَمّدٌ رّسُولُ اللّهِ وَالّذِينَ مَعَهُ أَشِدّآءُ عَلَى الْكُفّارِ رُحَمَآءُ بَيْنَهُمْ "
رحماء بينهم : متحابون متراحمون متعاطفون ، كالجسد الواحد ، يحب أحدهم لأخيه ما يحب لنفسه
يا ترى شكلنا هيبقى عامل إزاى ؟
شوف معايا المشهد ده
المهاجرين خرجوا من ديارهم وأموالهم
من غير ولا حاجة يدوب كل واحد رايح كده بنفسه مهاجرا لله ورسوله
دخلوا المدينة المنورة فآخى النبى صلى الله عليه وسلم
وآخى بين عبدالرحمن بن عوف وسعد بن الربيع
فسيدنا سعد قال له كلمات عجيبة : قد علمت الأنصار أنى من أكثرها مالا سأقسم مالى بينى وبينك شطرين ولى امرأتان فأنظر أعجبهما إليك فأطلقها حتى إذا حلت لك تزوجتها
سبحان الله كان كل منهم يعتبر أخاه نفسه وروحه
مع أن الناس فى زمنهم كان عندهم عصبيات جاهلية لا أول لها ولا آخر لكن لما انصبغوا بصبغة الإسلام كل شئ تغير
وأصبحت أخلاقهم وكل تصرفاتهم نابعة من الدين الذى يدينون الله به
فتجدهم متعاونين متكاتفين متحابين يؤثر كل واحد منهم أخاه ويفضله على نفسه
لدرجة إن الكأس كانت تدور عليهم وهم فى قسمة العطش والجهد وكل منهم يعطيها
لأخيه حتى ماتوا جميعا وما شرب منهم أحد
تعالوا نحب بعض
تعالوا نخاف على بعض وتبقى مصلحتنا واحدة
تعالوا نخدم الناس
شوف ايه اللى ناقص فى منطقتك وايه اللى الناس محتاجاه ووفره سواء لوحدك أو مع غيرك
لا تنس الفقراء وابحث عنهم ومتستناش إنهم يجيوا ويسألوك
خليك إجتماعى وشارك الناس علشان نوصل كلنا لرضا ربنا سبحانه وتعالى
 الموضوع : هل انت من النظام السابق ؟ المصدر : مسجد الهدي المحمدي الكاتب: أحلى حياة |
|
