الحلقة الأخيرة

انتهت فترة الامتحانات وبدأت الإجازة أخيرا .... وكانت كل واحدة من الفتيات قد وضعت خطة مسبقة لقضاء تلك الإجازة .....

بدأت دينا بالتماثل للشفاء في غضون فترة وجيزة منذ بداية العلاج كانت تصلي وتدعو في تلك الفترة.. وكانت دائما ما تذكر في دعائها بأنها لن تعود لمثل هذا أبدا
....



أما ندى فمن الواضح أن إنذارات الله معها لم تجعلها تتعظ وترجع عما هي فيه ....تطورت علاقتها كثيرا بحسام وتخطت حدود ما يسمى بالصداقة ....هو لم يصارحها بطريقة مباشرة ولكن كان دوما ما يقوم ببعض التلميحات ... جلست يوما تحادثه عبر الايميل ...

حسام : انتي ما زهقتيش من البيت وللا ايه ؟؟

ندى : ليه

حسام : لا عادي ....بس كنت عايز اشوفك يعني

ندى : مممممممم خلاص نكلم دينا وعمرو ونخرج يوم كده

حسام : هو لازم دينا وعمرو يعني ؟؟

ندى : انت مش عايز تخرج معاهم ؟؟؟

حسام : لا عادي ... بس انا بصراحة مخنوق اوي ومش عايز احكي حاجة قدام حد

ندى : مالك فيه ايه ؟؟؟ ما تقلقنيش عليك ..

حسام : لا ولا قلق ولا حاجة لما اشوفك ابقى احكيلك مش هينفع على الميل

ندى : طب قول اي حاجة دلوقتي ..كل ده ومش عايزني اقلق

حسام : مش عارف اقولك ايه بجد ربنا يخليكي ليا ... انتي انسانة جميلة اوي وطيبة ولو لفيت الدنيا مش هلاقي صاحبة زيك

ندى :

حسام : سكتي ليه ؟؟

ندى : ابدا

حسام : ممكن اسالك سؤال ؟؟

ندى : اتفضل

حسام : انتي ممكن ترتبطي دلوقتي ؟؟

همت ندى بأن ترد ولكن جاءها صوت والدها من خلفها : الله الله

انتفضت ندى بشدة وارتبكت ولم تستطع التصرف ...

الأب : ما تردي عليه يا هانم ... ما تكملي اللي بتعمليه ...ويا ترى بتعملي كمان من ورايا

ندى ودموعها تنهمر : ديه اول واخر مرة يا بابا

الأب : كدابة في اصل وشك ..ربنا ما بيفضحش حد من أول مرة ابدا .....وأخذ يصرخ فيها : انا ما عرفتش اربيكي ...خسارة فيكي كل حاجة بعملهالك ...علمتك احسن تعليم ما حرمتكيش من حاجة وانتي ماشية على حل شعرك ....

اقبلت الأم في ذلك الحين : ايه ايه ...صوتك واصل لاخر الدنيا فيه ايه ؟؟

الاب: تعالي يا هانم شوفي بنتك اللي خسارة فيها التربية بتكلم واحد ويا عالم كمان بيحصل ايه ...منك لله يا ندى حسبي الله ونعم الوكيل فيكي قصرتي رقبتي روحي يا شيخة منك لله

ندى : والله يا بابا انا ...

ولم تكمل الجملة فنزلت صفعة قوية على وجهها من والدها: اياكي تحلفي كدب ...اياكي ...لسه ليكي عين تتكلمي ....من انهاردة ما فيش كمبيوتر ولا خروج ولا اي حاجة ومش عتخرجي من اوضتك ...انا هربيكي من اول وجديد ...

كانت ندى ولأول مرة تتلقى مثل هذه الإهانة من والدها ...فيده لم تمتد عليها قط يوما من الأيام .....

كانت والدة ندى تقف مذهولة غير مصدقة ما يجري قالت : انا مش هقول غير اني ما عرفتش اربي انتي حتى الضرب خسارة فيكي ...روحي يا شيخة منك لله


جلست ندى تبكي وتبكي لساعات طويلة بل ولأيام طويلة ايضا ... أصابتها خلالها حالة اكتئاب شديدة فامتنعت عن تناول الطعام إلا اليسير منه ونقص وزنها بشكل ملحوظ ....

أما دينا فقد شفيت تماما واستمرت في العبادة بعد الشفاء بأيام قليلة ثم بدأت في ترك الصلاة شيئا فشيئا ....وبعد حوالي شهر تركتها تماما وعادت كما كانت من قبل....

قررت الذهاب للتصييف في الساحل كعادتها بصحبة والديها واخوتها ... لكنها اصيبت بنزلة برد شديدة وبدون مقدمات....فاضطرهم ذلك للانتظار قليلا ....

اشار عليها أهلها بتأجيل المصيف هذا العام ولكنها صممت على الذهاب ....

وفي أول ايامها هناك ...لم تخلع حجابها كالعادة فتلقت بعض التعليقات ....

الأم : ايه ده ...انتي هتنزلي تقعدي على البحر كده ؟؟؟ مش هتلبسي فساتينك الجديدة ..

دينا : لا ما انا قررت مش هقلع الطرحة بقى

الأم : مش بعادة يعني

دينا : اهو تغيير ...

الأم : طيب على راحتك ....

كانت رنا دائمة الاتصال بدينا وحريصة على أن تذكرها بالصلاة في أوقاتها وتنصحها دوما ولكن كانت دينا في الفترة الأخيرة توهمها بأنها تفعل كل ما تنصحها به...اتصلت بها رنا ..

رنا : الو ..السلام عليكم

دينا : وعليكم السلام ...عاملة ايه

رنا : انا تمام ...انتي اللي ايه اخبار المصيف معاكي

دينا : اهو شغال ....

رنا : اوعي بقى دوشة المصيف تاخدك وتنسي الصلاة في وقتها

دينا : لااااا ما تخافيش .. ثم قالت مغيرة مجرى الموضوع : بس سيبك قصيت شعري قصة تجنن ...

رنا : عند الكوافير اياه برضه

دينا : هه .... اه بس خلاص بقى

رنا : كده برضه يا دينا .... ده انا محلفاكي بالله

دينا : خلاص بقى اللي حصل ....قوليلي ما فيش جديد عن ندى ؟؟؟لسه برضه مانعين عنها التليفون

رنا : اه تقريبا ...بس انا نفسي اعرف ايه اللي حصل

دينا : مش عارفة بس انا قلقانة عليها أوي

رنا : ربنا معاها يا رب

دينا : يا رب....انا هقفل بقى عشان هنزل اوكي

رنا : خلاص ماشي خلي بالك من نفسك واوعي الصلاة تفوتك

دينا : ان شاء الله ...سلام

رنا : سلام

أما منى فبالطبع كانت تستغل الإجازة استغلالا تاما وكانت تتعاون مع البقية في فعل الطاعات فكانت تذهب مع صحبتها إلى دور الأيتام ورعاية المسنين ... وكانت
تخرج ايضا مع صديقاتها لشراء الملابس او تناول الطعام او ما شابه ...

اتصلت يوما بأميرة فردت عليها والدتها : السلام عليكم

منى : وعليكم السلام ..ازي حضرتك

والدة أميرة : الحمد لله يا حبيبتي انتي عاملة ايه ؟؟

منى : الحمد لله ...أميرة موجودة ...

والدة أميرة: اه موجودة بس نايمة وتعبانة اوي

منى بقلق : تعبانة ...ايه مالها تاني سلامتها ؟؟


والدة أميرة: عندها سخونية جامدة مش بتنزل وديناها للدكتور قال عندها دور برد بس جامد شوية ..وانتي عارفة برد الصيف وحش


منى : الف سلامة عليها ...طب ممكن اجي ازورها انهاردة انا ورنا ودعاء ؟؟؟

والدة أميرة: تنوروا يا حبيبتي واهو تخففوا عنها شوية ... انا مش عارفة جرالها ايه شكلها اتحسدت جامد

منى : معلش ..ان شاء الله تقوم بالسلامة وحضرتك ارقيها الرقية الشرعية

والدة أميرة: حاضر يا حبيبتي .

منى : طب انا هقفل واستأذن منهم في البيت واقول للباقي وجاية ان شاء الله

والدة أميرة: ماشي يا حبيبتي ربنا يخليكي ..ما تتأخريش بالله عليكي

منى : لا حاضر هنزل علطول أهو

اخبرت منى البقية فذهبن جميعا لزيارة أميرة وأخذت كل واحدة منهم تحاول التخفيف عنها ...

منى : ايه ميرو ما ينفعش كده خالص ...ايدك اتكسرت وقولنا ماشي ...بعديها بما فيش اسبوع رجلك تتكسر وقولنا عادي ...وكمان برد وسخونية ...لا كده بقى كتير...ايه نبعت نستورد قطع غيار ...

ضحكت أميرة بصوت واهن : شكلها هترسى على كده في الأخر ...

رنا : بس انا على فكرة بحقد بحقد حقد جامد ومش عادي

منى : وانا طبعا

دعاء : ايوه يا ستي مين قدك إن الله إذا أحب عبدا ابتلاه

أميرة : الحمد لله

شعرت البنات بأن أميرة تحتاج إلى الراحة فودعنها وذهبن ....

في هذا الوقت كانت والدة ندى تتحدث مع والدها ....

الأم : بقولك ايه البنت هتموت مننا ...كفاية عليها كده

الأب : انا مش قلت مش عايز كلام في الموضوع ده تاني

الأم : البنت خلاص بقت لحم على عضم وقاطعة الأكل ..انا خايفة البنت يجرالها ...واجهشت بالبكاء

رق قلب الأب وقال : خلاص بلاش عياط بقى ...انا هسمحلها بس بالكمبيوتر من غير نت ... وتكلم صحابتها اللي انتي عارفة ارقامهم ويكون قدامك ...ولو خرجت يبقى رجلك على رجلها ...

الأم : ربنا ما يحرمناش منك ويخليك لينا .....

نقلت الأم الخبر لندى فارتفعت معنوياتها قليلا لكنها في اليوم التالي استيقظت مفزوعة كعادتها في الفترة الأخيرة استغلت فرصة السماح لها بالهاتف وذهبت على الفور للاتصال بدينا ....

كانت شيطان دينا في ذلك الوقت يحاول معها جاهدا وأكثر من أي وقت مضى ...كان يحاول اقناعها بخلع حجابها والعودة كما كانت سابقا ....

الشيطان موسوسا : ايه ده ...انتي هتزلي كده تاني برضه

دينا : اه عادي بقى ...

الشيطان موسوسا : اومال انتي كنتي روحتي قصيتي شعرك عشان تخبيه تحت الطرحة ...مين هيشوفك بيه ؟؟

دينا : اه ...انا هموت واشوف صحابي هيقولولي عليه ايه ...بس انا قلت اني مش هقلعه

الشيطان موسوسا : بس الجو حر اوي وكمان انتي هتنزلي البحر كده ...والهدوم مقفلة وخنقة وبعدين انتي ناسية حفلة انهاردة هتروحيها بالطرحة برضه ... وهتعملي ايه في الفستان اللي اشتريته غالي ده ..هيترمى كده

اخذ الشيطان يوسوس ودينا تقاوم إلى أن

استسلمت تماما لتلك الوساوس ...وبدلت ملابسها وارتدت فستان مكشوف واسدلت شعرها ووضعت الماكياج ولم تنسى نظارتها الشمسية لتزيد من جاذبيتها ...واستعدت للخروج ولكن استوقفها صوت هاتفها المحمول وفوجت باسم ندى يظهر على الهاتف فردت على الفور ...

دينا : ندى مش معقول عاملة ايه

ردت ندى بصوتها المفزوع : دينا انتي كويسة

دينا : مالك في ايه يا ندى

ندى : ردي عليا انتي كويسة

دينا : اه كويسة ...فيه ايه مالك ؟؟؟

ندى : اصلي حلمت بيكي حلم وحش اوي قمت مفزوعة من النوم

دينا : يا ساتر ليه كده ؟؟

ردت ندى بقلق : ما اعرفش ..انا خايفة عليكي اوي

دينا : ما تخافيش انا كويسة المهم انتي عاملة ايه دلوقتي

ندى : انا الحمد لله ..دينا انا عايزاكي تخلي بالك من نفسك وحاولي ما تنزليش كتير من اوضتك

دينا : فيه ايه يا ندى ما كانش حلم يعني

ندى : برضه خديني على قد عقلي وخلاص

دينا : حاضر يا ستي ...بس انتي بعد كده ابقي اشربي اللبن قبل ما تنامي واتغطي كويس ومش هتحلمي الاحلام الوحشة ديه تاني

ندى : ماشي اتريقي براحتك ...بصي انا هكلمك بعدين عشان ماما بتنادي عليا سلام

دينا : اوكي سلام ..

شعرت دينا بالخوف قليلا وخشيت أن يصيبها مكروه ولكنها طردت تلك الأفكار من رأسها وهمت بالخروج .... ولكن طرف ثوبها علق بشئ ما وحاولت نزعه فتمزق ....

دينا : يووووووووه لسه هغير تاني ...انا هلبس اللبس اللي كنت لابساه من شوية وخلاص

الشيطان موسوسا : لاااااا ... وبعدين كل صحابك تحت لابسين كده.. تبقي انتي اللي شكلك غريب في وسطهم يعني ...هدومك كتير البسي اي حاجة تانية

فارتدت دينا فستانا لا يقل سوءا عن السابق ... ونزلت لتتلقى صيحات الإعجاب من جميع الحاضرين ...

الأم : ايوه كده يا شيخة .... احنا جايين مصيف ..

دينا : اه ما انا قلت كده برضه والجو حر كمان اوي انهاردة

كان في ذلك الوقت حفلة من حفلات الشاطئ وكان الجميع فتيات وشباب يرقص ويغني ....

الأم : ما تقومي تقفي مع اصحابك هناك بدل ما انتي قاعدة كده ...

دينا : لا شوية كده ...

قالت احدى صديقاتها الجالسين بجوارها : لا بطلي غلاسة بقى وقومي ..ديه الرقصة اللي انتي بتحبيها

قامت دينا بالفعل وأخذت ترقص مع هذا وتضحك لهذا وآخر يجذبها من يدها لترقص معه ...

وفجأة أخذت تقوم بحركات غريبة وتتشنج واتسعت عينيها بخوف وفزع وسقطت على الأرض ...

تجمع كل الحاضرين حولها ووالديها .....

الأم بفزع : دينا .......دينا يا حبيبتي مالك ....

اخذت دينا تتمتم بكلمات غير مفهومة للحاضرين : خلاص ....خلاص عمري ما هقلعه تاني ...

هلبسه ...مش هقلعه تاني ... اخر مرة ....

ايقن احد الحاضرين بانها في سكرات الموت فأخذا يلقنها الشهادة

ولكن كانت صوت الأغاني كان لايزال مدويا وبالطبع كان الشيطان واقفا عند رأسها فها هي لحظة الانتصار التي حققها أخيرا ....

وبدلا من ان تنطق الشهادة اخذت تردد كلمات الأغنية وفجأة ...اختفى صوتها تماما .....وفاضت روحها إلى حيث يعلم الله ....

اخذ الجميع في الصراخ من حولها واحتضنتها أمها بشدة وأخذت تبكي وتنوح : انا اللي عملت كده فيها ...انا اللي عملت كده ......ثم أخرجت صرخة مدوية من اعماق أعماق قلبها : اااااااااااااااااااااااااااااااااااااااه رحمتك يا رب .....

وسقط والدها مغشيا عليه من الصدمة ....

وصل الخبر إلى صديقاتها ..... شعرن جميعا بالصدمة المدوية ..... ولكن حمدن الله ورضين بقضاءه


أما ندى فقد أصيبت بصدمة شديدة وراحت تبكي وتنوح وتصرخ واصيبت بصدمة دخلت على إثرها المستشفى

وفي يوم الغسل لاحظت مغسلة الموتى انها في وضعية غريبة فقد كانت واضعة احدى يديها على خصرها واليد الاخرى مرفوعة لاعلى فوق رأسها ...حاولت إعادة وضعية جسدها كما كانت ولكن بلا فائدة ...

حاولت تليين الجسد بالماء الدافئ بل بالماء الحار ولكن بلا فائدة ....

ألحت على أمها في السؤال عن سبب تلك الوضعية فقالت انها عندما جاءت كانت طبيعية ولكنها صارت هكذا عند الغسل .... سألت عن طريقة الوفاة فعلمت أنها ماتت وهي ترقص ...فكفنتها على تلك الحالة ودفنت في وسط نحيب الأهل والأصدقاء .....وذهبت إلى المكان الذي لا ينفع فيه سوى العمل الصالح .....

مرت فترة عصيبة على جميع أفراد الشلة خشيت كل منهن من خاتمة السوء ... فاجتهدت كل واحدة منهن أشد الاجتهاد في العبادة .....

وجاء الشهر المرتقب ....شهر رمضان ....كانت كل واحدة تعبد بأقصى طاقة لها ...وخاصة أميرة ...فقد كانت تختم القرآن بشكل يومي وتقوم الليل بلا انقطاع ....

وفي يوم اتصلت بمنى لتزف إليها خبرا سارا:ايه رايك في الخبر ده بقى

منى : انا مش مصدقة ...الف مبروك ...عقبالي يا رب

أميرة : انا بقالي كتير بدعي ربنا ..واهو الحمد لله عمرة اخيرا ...وفي العشرة الأواخر كمان

منى : ادعيلي هناك كتيييييييير اوي اوعي تروحي هناك وتنسيني

أميرة : انا اقدر برضه .... انا فرحتي بجد ما تتوصفش

منى : تروحي وترجعي بالسلامة ان شاء الله ....

أميرة : ان شاء الله

جاء اليوم الموعود ...يوم الذهاب إلى بلد الله الحرام .. كتبت أميرة بعض الأوراق ووضعتها قبل سفرها بشكل واضح على المكتب في غرفتها واغلقت الباب واستعدت للسفر ....

الأم : ها يا أميرة كله تمام ...ناسيين حاجة

أميرة: لا يا ماما

الأم : طيب يللا عشان بابا مستني تحت

بعد أكثر الرحلات جمالا .... وصلت أميرة ....

وأخيرا شاهدته ....أجل أنه بيت الله العتيق .... اخذت تدعو وتطوف وتبكي .....كان نور الإيمان يتلألأ في قلبها ...لم تشعر بمثل هذا الصفاء والنقاء في حياتها من قبل.. كانت تدعو لكل من أوصاها بالدعاء وخاصة منى ..كانت تدعو لها مثلما تدعو لنفسها وأكثر ....

كانت في ايام العمرة تتصل للاطمئنان عليها وفي يوم اتصلت قبل صلاة الفجر بقليل ...

أميرة : السلام عليكم

منى : وعليكم السلام

أميرة : اوعي تكوني نمتي

منى : انا اقدر برضه ...بتدعيلي وللا لا

أميرة : ربنا يعلم ... اوعي تكوني مقصرة في العبادة

منى : لا الحمد لله ربنا مقويني ...

أميرة : هتوحشيني اوي لحد ما اشوفك

منى : وانتي كمان ربنا يعلم

أميرة : اوعي همتك تضعف في العبادة ...ولا حتى بعد رمضان ...اوعي شيطانك يغلبك يا منى في يوم

شعرت منى بغرابة في حديث أميرة ولكنها لم تدقق : ان شاء الله ...ربنا المستعان

أميرة : انا عايزة اقولك على حاجة مش عارفة ليه ... انا بحبك في الله اوي...ونفسي انتي كمان تكوني بتحبيني في الله ولأجل الله ....لأجل لله بس يا منى

منى : أميرة انتي مضايقة من حاجة

أميرة : بالعكس ...ده انا عمري في حياتي ما حسيت براحة نفسية قد انهاردة

منى : يا رب دايما .... انا كمان يا أميرة ...بحبك في الله اوي ...وعمري لا صاحبت ولا هصاحب زيك في حياتي ...

أميرة : ولا...أنا

سمعت أميرة صوت المؤذن ينادي لصلاة الفجر فقالت : منى دلوقتي اذان الفجر ...انا هنزل اصلي بقى .

منى : ماشي يا حبيبتي وما تنسيش تدعيلي

أميرة : ان شاء الله ..... استودعك الله الذي لا تضيع ودائعه

انتهت المكالمة وشعرت منى بأحاسيس غريبة ولكنها قامت لتكمل تلاوة القرآن .....

نزلت أميرة بصحبة والديها إلى الحرم لصلاة الفجر ..وانتبهت الأم أن أميرة تتصبب عرقا : مالك يا حبيبتي انتي تعبانة

قالت أميرة بصوت شبه ضعيف : لا الحمد لله كويسة بس شكلي هاخد برد تاني ما تقلقيش

الأم : طب افطري لو تعبانة

أميرة : هو اليوم بيتعوض في رمضان ..ما تقلقيش يا حبيبتي انا كويسة الحمد لله

حان وقت الصلاة وقفت أميرة تصلي بجوار والدتها وفي آخر ركعة سجدت ...ولكنها لم ترفع رأسها من السجود ...

تسارعت دقات قلب والدتها وخشيت أن يكون حدث ما يجول بخاطرها ....انتهت الصلاة ...


اخذت الام تحرك جسد أميرة .....لم تتحرك ...

الأم ودموعها تنهمر : أميرة ...قومي بقى يا حبيبتي الصلاة خلصت خلاص

يا أميرة ......قومي يا حبيبتي ......

حركت جسدها بهدوء ....فوجدت على وجهها ابتسامة لم تر مثلها في حياتها ....

ايقنت بما حدث أخذت تردد : انا لله وان اليه راجعون ...ان لله وانا اليه راجعون ...انا لله و..... واجهشت في البكاء واحتضنت ابنتها بشدة واخذت تقبلها .....

حضر والدها فتسمر في مكانه من الذهول واخذ يردد انا لله وانا إليه راجعون ويقبل راس ابنته غاليته ...حبيبته ...ابنة عمره ....ويبكي ....ويضحك ...يبكي ....ويضحك ...

فاضت روحها ذهبت للقاء فارقت أحبائها وذهبت لحبيبها ....ذهبت بعد عمر قصير ولكن ملئ بالطاعات .........

بعد اجراءات الغسل والدفن ....وعلامات حسن الخاتمة .... شرعت الأم في إخبار الأقارب بما حدث ...... واتصلت بمنى وأخبرتها ...

منى في ذهول :..................انا لله وانا إليه راجعون اللهم أجرني في مصيبتي واخلف لي خير منها ...

اخذت تنظر حولها وتتعجب ودموعها تسيل وتسيل

والدة أميرة : منى ....منى يا حبيبتي

لم ترد منى : ولكن خرجت مسرعة من غرفتها فوجدت أمها ..

الأم بفزع : مالك يا منى ؟؟؟

منى بصدمة : انا مؤمنة ...مش هقول غير الحمد الحمد لله ....انا مؤمنة

وسقطت مغشيا عليها ........

أخذت أمها تحاول إفاقتها : منى ...ردي عليا يا حبيبتي ..انتي سامعاني

أفاقت منى وقالت وهي تبكي : أميرة ...أميرة ماتت يا ماما ....ماتت

صدمت الأم : لا حول ولا قوة إلا بالله ...اهدي يا حبيبتي انتي تقية ومؤمنة ما تعمليش كده ...

حاولت منى استجماع قوتها وذهبت لتخبر صديقاتها ...ولم تقل صدمتهم عنها ....

ذهب الجميع إلى عزاء أميرة حتى ندى بعد ان هداها الله واتعظت من موت دينا .... وسردت والدتها قصة وفاتها ..... والجميع لا يدري أيحزن لموتها أم يفرح لمثل تلك الخاتمة .....

ذهب الجميع واصرت منى على البقاء حتى أخر اليوم ...

والدة أميرة : منى يا حبيبتي ....أنا لقيت في اوضة أميرة رسايل كاتبة لينا رسالة وكاتبة ليكي رسالة يا حبيبتي زي ما يكون قلبها حاسس

تمالكت منى دموعها وقالت : الله يرحمها ...

كانت أميرة قد كتبت رسالة تواسي بها من تحب بعد موتها ...أخبرت أمها في رسالتها إليها بأنها أتممت حفظ القرآن الكريم كاملا وكانت تخفي ذلك عن جميع الناس إلا محفظتها وعدد لا يكاد يذكر ...حتى منى لا تعلم بذلك .... كانت تريد أن تصبر أمها بأنها ستهديها ان شاء ربها تاج من نور يوم القيامة ....واوصتها بأن تقرأ من المصحف الخاص بها ولو صفحة يوميا ...لكي تستمر حسناتها في الزيادة حتى بعد وفاتها .....

جلست منى في غرفتها وفتحت الرسالة وعيناها مليئة بالدموع ....

السلام عليكم ورحمة الله وبركاته

أختي وحبيبتي في الله منى ....

انتي زعلانة انا عارفة .....بس لو قلتلك اني كنت بتمناها تزعلي برضه ؟؟؟

كنت ليل نهار بدعي ربنا اموت وانا ساجدة في بلده الحرام يا رب يكون الحلم ده اتحقق ....

عملتي ايه لما عرفتي الخبر ....صبرتي واحتسبتي وللا لا ؟؟؟

دموعك ديه غالية عندي اوي انا عارفة انك زعلانة ...بس احنا اللي جمعنا الحب في الله ...يعني خلي قلبك كله مع الله ...ياما هنفارق ناس بنحبهم ويحبونا ...بس الدنيا ساعة ..وكلها ساعة ونتقابل عند حوض النبي صلى الله عليه وسلم ان شاء الله

اوعي تكوني نسيتي الاتفاق ده ....ازعل منك

اوصيكي بالعبادة ...اوصيكي بالقوة في دينك ...بصلاتك ....

اوعي شيطانك يا منى ....خلي الصدمة ديه تعدي من غير اي خساير ....اوعي يغلبك اوعي ....اوعي يضعف همتك يوم ...
اي ابتلاء بيكون عشان ربنا يشوف احنا ايه بجد ....
احنا متعلقين بيه هو وللا بغيره

وانا بقى يا ستي بما اني مش هبقى موجودة معاكي في حاجات كتير فأنا عايزة أقولك مبروك من دلوقتي ...

مبروك على حفظك للقران وتخرجك بتقدير امتياز ان شاء الله

مبروك على زواجك من شاب تقي صالح ان شاء الله وانا واثقة انك هتبقي عروسة زي القمر

مبروك على أول ابن او بنت ليكي .....وربيهم على التقوى وحب الله .....

وفي النهاية لياعندك رجاء ....انا مش عايزاكي تنسيني من دعائك ابدا مهما حصل .... كل ما تفتكريني او اجي على بالك كده ادعيلي.......

وعايزة اقولك اني عمري ما حبيت صاحبة ليا في حياتي زي ما حبيتك يا منى وأسال الله العظيم أن يظلنا في ظله يوم لا ظل إلا ظله وأن يجمعنا في زمرة المتحابين في جلاله

أحبك في الله

احتضنت منى الرسالة وأخذت تبكي وتدعو لها ......

مرت الأيام والأسابيع وبدأت منى تعود لحياتها الطبيعية ولم تنسى أميرة يوما واحدة ولم تنساها من دعائها ابدا .....

جلست منى يوما بعد صلاتها واتكأت برأسها إلى الحائط خلفها ....واغمضت عينيها واخذت تتذكر كل الأحداث التي مرت في حياتها ....

[/size]
منى : انا كنت ايه يا رب ....انا كنت ولا حاجة من غيرك ...فضلك كبير اوي عليا ....لو كنت سبتني كان هيحصلي ايه لو ما كنتش دلتني على طريقك كان هيجرالي ايه .....

لك الحمد على ما هديتني وعلمتني .....ولك الحمد بأنك وحدك أهلا للحمد ....ولك الحمد بأنك ربي وأنك من أعبد وأرجو وأخشى وأحب .....أحبك بقلبي كله ..وأرضى بقضائك كله.... وعزتك ما عبدتك حق عبادتك ولا وفيتك حق شكرك ....ربي اعوذ بك من شر نفسي ومن شر شيطاني وشركه ... اللهم قنطه مني كما قنطه من عفوك وباعد بينه وبيني كما باعدت بينه وبين جنتك ...واطرده من قلبي كما طردته من رحمتك ....

ربي اصطنعني لنفسك واستعملني ولا تستبدلني ...ربنا لا تزغ قلوبنا بعد إذ هديتنا وهب لنا من لدنك رحمة إنك أنت الوهاب .....

خلصت قصتنا ؟؟؟؟اه خصلت ....او يمكن ما خلصتش !!!...

بعد تفكيرعميق ومطول ....يبقى لسه ما خلصتش

فيه مننا اللي فاضلله فيها 20 سنة او 40 او شهر واحد او حتى يوم او يمكن كمان دقيقة واحدة ....مين عارف ؟؟؟؟؟؟

وكل واحد مننا هينهي قصتها على قدر مجاهدته لنفسه واستعانه بالله ....

فيه منا اللي هيكون خاتمته زي دينا والعياذ بالله ربنا ينجينا كلنا ....

وفيه اللي هيبقى زي أميرة ربنا يرزقنا .....

بس طبعا الطريق لحسن الخاتمة مش مفروش بالورد لااااااااا ..

فيه حد واقف مستنينا حد بيراقب كل خطواتنا مستنيلنا على هفوة عشان بس نقع .....

خطته معانا انه يوصلنا لسوء الخاتمة او الكفر او ترك العبادة ....

خلي بالكوا هو ماشي معانا بالتدريج في كل حاجة لو كانش هيخليك تسيب دينك يبقى هيخليك في غفلة..... ولو التزمت هيحاول يبعدك ولو ما نفعش هيحاول يكرهك في العبادة والالتزام ويشككك في اللي حواليك ولو ما نفعش برضه يبقى هيحاول يبعدك عن بعض الطاعات او يكسلك فيها او يشكك في التزامك ولو ما نفعش برضه يبقى هيخليك تكثر من المباحات او تقدم الاقل أهمية على الأهم ويقولك ما هي ديه عبادة وديه عبادة برضه

انا بتكلم كأني في حرب مش كده ؟؟؟

طب ما هي فعلا حرب وبنص القرآن (إن الشيطان لكم عدو فاتخذوه عدوا إنما يدعو حزبه ليكونوا من أصحاب السعير)

حرب ....حرب يا جماعة بس احنا اللي نايمين .....

اااااااااااااه لو تعرفوا بيكرهنا أد ايه وتاخدوا بالكم بس ....

قصة برصيصة العابد ....طلب منه وقاله ايه ......اسجدلي!!!!!

متخيلين كمية الغل والحقد والكراهية اللي في الكلمة ديه ......عشان ربنا طلب منه ان يسجد لأدم واستكبر ظنا منه انه احسن منه .... بقى جواه غل وحقد تجاه أي بني آدم ......

بصوا في القصة كويس واحدة غلبته كانت حسن خاتمتها ايه !!!

وواحدة غلبها كانت موتتها شكلها ايه !!!!!

قصة الوفاة ديه بالمناسبة قصة للأسف حقيقية وانا عدلت في الاحداث بس عشان تناسب القصة لكن فعلا حصلت والمقطع منتشر على النت .....

الخلاصة يا جماعة احنا هنوصل معاه لإيه بالظبط؟؟؟؟ هيعمل معانا ايه واحنا حنعمل معاه ايه ؟؟؟؟
لسه هنطيعه لسه هنقول على كل حاجة في حياتنا ماهو عادي
لسه هنقول انا احسن من غيري

ده اللي كل واحد دلوقتي يقرره مع نفسه وده اللي كل واحد فينا هيعرفه فيما بقي له من حياته القادمة ......

اللهم اجعل عملي كله خالصا لوجهك ولا تجعل لأحد سواك فيه نصيبا ...اللهم ما كان صواب فمنك وماكان خطأ فمن نفسي ومن الشيطان .......

وأعوذ بالله أن أكون جسرا تعبرون به إلى الجنة ويلقى به في نار جهنم ....

تمت بحمد لله وتوفيقه

رجاء بالله عليكوا تنشورها في كل مكان