أحلى حياةمدير عام المنتدى
تاريخ التسجيل : 10/08/2009
 |  موضوع: ليه فتحنا قسم لتربية الأبناء ( طفل مش عادي )  الأحد 14 مارس 2010, 12:07 am | |
|
ممكن تكون أخت تلقت خبر إفتتاح قسم (طفل مش عادي) المهتم بتربية الأبناء
ويقول: وأنا مالي ومال تربية الأبناء!! مش لما أتزوج !!
ونحن هنا بين فتاة في سن الزواج أو مخطوبة ومقبلة على الزواج أو أم بالفعل
ووظيفة الأم وظيفة خطيرة جداً وده مش كلام إنشا
المرأة هيه إلى بتأثر وبتشكل شخصية الرجل والمرأة بردوا!
تخيلي كده إن لو ابن الحلال جيه دلوقتي وتبصي بعد كام شهر تلاقي نفسك فجأة حامل وهتبقى ام
عارفة يعني إيه أم؟!!
يعني هتشكلي جزء من مستقبل الأمة
يعني هيبقى في إيدك تشكلي شخصيات ناس! هيبقى أمانة في إيدك يا إما تضيعيها وتعيشي في تعاسه يا إما تكوني أم ناجحة
عارفة إن تربية الأولاد فـــــــــرض !
واجب لو مقمتيش بيه أثمـــــــه
وعلماء التربية بيقولو لحد سن المراهقة إنتي دورك في التربية بنسبة 75% !!
تخيلي إن هيبقى في رقبتك ناس يوم القيامة إنتي مسئولة عنهم من جهتك مسئولية كاملة ولا زم تقومي بدورك بنسبة 100%
طيب قوليلي بقى لو ابن الحلال جيه وفي ظرف كام شهر تحولتي من مسئولة من أهلك لمسئولة عن ولادك
عندك إيه تقدميه لولادك؟!
إنتي فاهمه أصلا يعني إيه تربية أولاد؟
قرأتي كام كتاب وسمعتي كام محاضرة عن تربية الأولاد؟!
أنا كل ما اقرأ في تربية الأولاد كل ما يحصل عندي يقين إنك لو عرفتي المفتاح وفهمتي واتعلمتي إزاي تربي هتبقى المسألة بإذن الله وتوفيقه تعالى قبل كل شيء سهلة جداً
في حين إنك لو مثلاً متفهمتيش عند إبنك وهوه عنده سنتين وعاملتيه بعقاب خطأ هتجني مرار كده خلل في شخصيته طول عمره وعمرك!
المسألة بجد يابنات خطيرة
مش عايزين لما يفوت الفوت نقول ياريت نلاقي حد ياخد بإيد ولادنا ! والله سمعتها من أم أبنها عنده حوالي 18 سنة وبرغم إنها حافظة للقرآن إلا إنها معرفتش تحتويه وتربية صح وبتدور دلوقتي على حد يربيه لها!!
دلوقتي الضياع بقى سهل أوي فلازم تأثيرك في البيت يبقى أكـــــــبــــــر من تأثير المجتمع ككــــل
والتربية مش صح وغلط وعيب
التربية إحتواء
التربية نفسية وإجتماعية وعبادية وأخلاقية
كل حاجة في دول حاجة منفصلة
وبجد والله علم ممتع جــــــــــــــــــــــــداً
والنجاح فيه متعة رهيبة بالذات بقى لو عندك أخوات صغيرين أو ولاد أخواتك تعمليهم حقل تجارب :)
فبجد أرجو إنكم متحذلونيش ونبقى عون لبعض بإذن الله
وهحاول أختار موضوعات قصيرة ومفيدة بس ياريت تعينوني ويبقى في تواصل ونقاش
وأذكر كلمة لأحد الدعاة :أوصي كل فتاة إنها لا تترك أي شيء عن تربية الأبناء إلا وتقرأه وتسجل إلى يفيدها منه وتجرب في إلى حواليها
وافتكري إنك ممكن في فترة قصيرة جدا تتحولي لأم ويبقى ولادك
طريقك للجنة
أو
طريقك للنار والعياذ بالله
وأنتِ الأمة بأسرها
فأنتِ نصف الأمة
وتلدين النصف الأخر
 الموضوع : ليه فتحنا قسم لتربية الأبناء ( طفل مش عادي ) المصدر : مسجد الهدي المحمدي الكاتب: أحلى حياة |
|
