خلي بالك من الإشارات !! خلي بالك إنذاار ::: خلي بالك مسدود

10/08/2009

الناس الي متعودة تمشي على الطرق السريعة او الطريق الدائرى أو المحور أو طرق السفر عامة الزراعية او الطرق الصحراوية .. كل الناس دي عارفين ان في إشارة بتحصل ما بينهم وما بين بعض والاشارة دي بيكون معناها احترس في شيء خطر

إيه الي بيحصل ؟

دي صورة توضيحية

العربيات الي على اليمين دي وهي ماشية شافت على الناحية اليسار لجنة بتوقف العربيات .. فالعربيات الي على اليمين لما شافت اللجنة بتوقف العربيات الي جيا من اليسار فراحت العربيات الي علي اليمين اعطوا اشارات بالفانوس أو الكشاف الأمامي للعربية بيقعدوا يدوا اشارة ويقفلوا ويدوا اشارة ويقفلوا ( فلاش )

عشان يفهموا العربيات الي على اليمين ان فيه لجنة او في شيء خطر فلازم تهدي عشان الردار ميلقطش سرعة العربية وتتاخد مخالفة ..

الي عايز اقوله ان الحركة دي محدش من الي بيسوقوا ميعرفهاش وأن لما بيكون فيه لجنة تلاقي اكثر من 80 % من السيارات الي على الجانب التاني الي جيه وشافت اللجنة بتنبه الناس الي داخلين على اللجنة عشان يهدوا السرعة ..

ومفيش إنسان عاقل ماشي ويشوف كمية الاشارات الكتير دي من الناحية التانية ويقول لاء الناس بتضحك عليا دول أكيد غيرانين مني عشان انا ماشي بسرعه !

اكيد مش كلهم بيضحكوا عليك لأسباب كتير أولها انهم ملهمش مصلحة !!

ثانياً الناس دي متعرفش بعضها عشان كلها تجمع على رأي واحد وكلها بتديك إشارة واحده وفي نفس الوقت وكمان مش شايفين بعض ولا متفقين ..

أو لما تلاقي ناس كتير بتحذرك من شيء وبتديك إشارة انه خلي بالك الطريق ده خطر أو على الاقل اخره مسدود .. مش لازم تروح بنفسك تجرب انه مسدود وصدقهم ..

هل ينفع نبقى قاعدين في شركة كبيرة او في المطار مثلاً وكل أجهزة الإنذار بتااعة الحريق تضرب وتصفر وانت تقعد تقول لاء انا مشفتش حريق بعنيا ؟ ! لازم اجرب بنفسي !!

هل ينفع تبقى على أول الشارع !! ولقيت ناس خارجة من الشارع وناس تعرفها كويس ومحترمين بتجري وتقولهم في ايه يقولوا ليك في ناس سفاحين في الشارع بيدبحوا الي يدخل وتعمل فيها اسد !! وتقولهم لازم اشوفهم بنفسي !

يبقى لازم تقتنع ان في خطر لازم تاخد بالك منه ..

ده بخصوص الطريق وكمان في حياتنا العادية

ده بيحصل في حياتنا كتير نحذر واحد من التدخين وكل الناس المدخنين والغير مدخنين بيحذروا من التدخين .. وبالرغم من كده الانسان بيجرب ويشرب وبعد كده يقف في طابووووور المحذرين من التدخين ! طيب ليه مسمعتش الكلام من الاول ولا لازم تجرب ؟ !

الناس كلها بتقول ان طريق المعاصي ده وحش وطريق المشي مع البنات آخرته مش كويسه وطريق الصحبة السيئة ده طريق مـُر وآخرته وحشة

ليه ياجماعة كل طريق الناس كلها تحذرنا منه بنقرر اننا لازم نجربه ..

بس للأسف التجربة ممكن متمرش على خير ..

يعني لو واحد مثلاً قالك ده انا كنت زمان مقطع السمكة وديلها ومقطع البطيخه وبذرها ومقطع مصر بشعبها ! كل ده حلو ؟ ( لاء مش حلو )

وبعد ما قالك كده قالك ده كان زمان وكانت ايام مش كويسه بس انا الحمد لله دلوقتي ربنا تاب عليا !

أوعا تفتكر انك لو مشيت في نفس طريقه انك هينتهي طريقك زي ما انتهى عند صاحبك بتاع السمكة ده !

لاء لاء

لان في ناس كتير مشيوا في الطريق ده وملحقوش يحكوا لحد توبتهم لان منهم الي مات او في الحبس او مازال مكبوب على وشه في المعاصي مش شايف حاجه قدامه !

الأم الي لما نقولها خلي بالك من بناتك ومن أولادك تقول سيبهم يعيشوا الدنيا ما احنا كنا بنعمل كل حاجه واحنا صغيرين والحمد لله ربنا تاب علينا !

صحيح ربنا تاب عليكي بس مش شرط يتوب عليهم هم كمان عشان اولادك ! اصل التوبة مش وراثة !

اعرف واحده كانت بتقول كده عن بنتها وبنتها ماتت في عز شبابها وهي 20 سنة ماتت وملحقتش تتوب !

ولا لحقت حتى تحكي للي بعدها ولا تحذرهم من الطريق الوحش والصعب وطريق الذنوب ..

ياجماعه خلي بالكم من اشارات الي سبقوكم

خلى بالك من تحذيرات الناس الي مشيت في الطريق الي انت فيه دلوقتي !!

فلو انت ماشي في طريق المعاصي والاغاني والبنات وكل لما تيجي في نفسك شيء تعمله خلي بالك وتعالى اسمع الناس الي كانوا زيك بل كانوا مستمعين اكتر منك

يعني واحد زي تامر حسني تعرفه ؟ اكيد تعرفه مين ميعرفوش تامر حسني اكيد انت مش مختلف معايا انه مليونير ! صح وعنده عربيات كتير صح ؟

طيب لو شاور لأي بنت هتقوله جوزتك نفسي على طول صح؟

طيب ايه رايك بقا فيه ؟ عايش حياته بالطول والعرض والارتفاع صح ؟

طيب ايه رايك انه هو نفسه مش عاجبه حياته ؟ ونفسه يسيبها ويرجع لربنا

شوفه واتفرج عليه بنفسك وهو بيقول كده فيديو

للتحميل من فضلك اضغط هنا

الهدف في الاخر من الموضوع اني اقولك خلي بالك الناس الي مشيوا في طريق المعاصي

بيحذرونا

والناس الي مشيت في طريق الطاعة محدش فيهم اشتكى ومحدش فيهم قالك الطريق وحش !!

يبقى تختار انهي .. ؟

وأوعى تقول لازم أجرب بنفسي الطريق المسدود ؟؟؟ !!!

ولا ايه رايك تعافي نفسك بمعافاة الله وتبعد عن طريق المعاصي ومش لازم تجربه لان للأسف ممكن تجرب ومتعرفش ترجع زي غيرك !!

حتى لو بدأت تتوب لازم تسمع من الي تابوا قبلك واعرف منهم واتعلم وخد نصايح وابعد عن اي شيء يحذروك منه

خلي بالك من الإشارات خلي بالك من الي سبقوك

واعتبر بمن مات قبلك واعتبر بمن تاب قبلك !

وخليك معانا في

أحلى حياة في طاعة الله

كلنا جنبك إن شاء الله

وخلي بالك :)

اللهم بلغت اللهم فاشهد

أحبكم في الله
ولا تنسونا من صالح دعائكم

الموضوع : خلي بالك من الإشارات !! خلي بالك إنذاار ::: خلي بالك مسدود المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

خلي بالك من الإشارات !! خلي بالك إنذاار ::: خلي بالك مسدود

خلي بالك من الإشارات !! خلي بالك إنذاار ::: خلي بالك مسدود

مواضيع مماثلة

مواضيع مماثلة