يا عم كلنا لازم نعيش في الدووووووور

10/08/2009

أصل لازم نعيش في الدوووووووووووووووووووور

الإنسان الي لابس بدله

بتكون مشيته وحركته واسلوب كلامه مختلف عن الانسان الي لابس بنطلون جينز

الي لابس بدله بتكون مشيته لارج وكلاسيك جداً صعب تلاقيه رايح يركب ميكروباس يا أما معاه عربيه يا اما يركب تاكسي حتى ولو هو متعود يركب ميكروباس لكن وقت البدله ميصحش يركب ميكروباس او يتشعلق في اتوبيس عام ..

غير الانسان الي لابس قميص وبنطلون..

تلاقيه شاب ماشي ماسك الموبايل في ايده يدخل ياكل في محل كشري بيعمل الي هو حابه يركب تاكسي يركب اتوبييس عادي ..

الشاب الفانكي الي لابس شورت ونازل يقف في الشارع شاب روش علي الاخر لابس الموبيل زي السلسلة ( حاطه في رقبته )

ولابس شبشب بصباع ولابس كاب أديدس ..

الشاب ده بقا عادي يقعد علي شنطة عربية يقعد علي الرصيف مع اصحابه ..

يلعب كورة في الشارع مع الشباب .. عادي ..

صاحبنا الاولاني بتاع البدله والتاني بتاع القميص البنطلون والتالت الروش ده ..

كل واحد منهم ليه اسلوب كلام وليه طريقه ماشيه وممكن تقول اسلوبه كله بيتغير ..

والمفاجاه إنك تعرف ان ممكن شخص واحد بس

ممكن يلبس الثلاث أطقم دول واسلوبه يتغير بطريقه لبسه ..

مش الاسلوب بتاعه اتغير عشان ده فقير وده غني ..

ممكن تلاقيه شاب ابوه مليونير والواد نازل بالشورت وبيقعد في الشارع وكده

وصاحبنا بتاع البدله ده راجل غلبان مأجر البدله ..

يعني بتاع الشورت أغني من بتاع البدله بس اسلوبه والناس شايفها بلبسه ده وممكن كون شكله ابن البواب مش ابن مليونير !!!

مع كامل احترامي لمهنة البواب

لو روحنا لنفس صاحبنا ده .. وجيبنا ليه عربيه فور باي فور جيب مثلاً او bmw او جاجور مثلاً أي عربيه غاليه سعرها يعدي ال300 الف جنيه مثلاً :

.زي دي كده

والكل يغض بصره

هتلاقيه قاعده قعده معينه فيها شويه عنتظه

( الا من رحم الله )

هتلاقي اسلوب سواقته مختلف طريقة في الكلام وهو قاعد في العربيه مختلف نزلته من العربيه ليها اسلوب دخوله العربيه ليه اسلوب ..

ولنفس صاحبنا ده لو حصلت بيه ضائقه ماليه ربنا يعافي الجميع واضطر انه يبيع السياره دي ويجيب حاجه أقل منها شويه فجاب عربيه لانسر البومه 1300 سي سي بـ 90 الف جنيه

( ياعيني عليه )

هتلاقي اسلوبه وهو سايق اتغيير دخول العربيه والخروج منها هتلاقيه اتغير ..

هتلاقي مسكته للدريكسيون اتغيرت بعد ماكان في البي أم بيمسك الدريكسيون بإيدة الشمال بس ويفردها ويسقط نفسه علي الكرسي وكانه علي السرير ..

وكانه يركب طائرة دلوقتي يا حرام الموضوع قل شويه ..

ولو نفس صاحبنا ضاقت به الدنيا مره اخرى
( ربنا يعافيه ويعافينا )

وباع السياره اللانسر وجاب عربيه علي قده

او

سايت ب14 الف جنيه

فيها باب واحد

يدوبك فيها كلاكس

والعربيه بتفتح من برا بس ..

والعربيه مفهاش غير فانوس واحد شمال يشبه فانوس رمضان ..

هتلاقي نفس صاحبنا ده راكب العربيه بإنكسار ماسك الدركسيون بإيده الاتنين ومقرب دماغه من الزجاج ..

هتلاقيه مش خايف علي العربيه بيركنها في نص الشارع عادي ممكن يسيب الشباك مفتوح عادي ممكن يطلع بيته من غير ما يقفلها ..

هتلاقي تعامله مع العربيه ومع الناس الي شايفاه بالعربيه مختلف .

ليس انكسار بتاع السايت بسبب فقره وانتفاخ بتاع البي أم بسبب غناه .. لا لا لا

ممكن بتاع البي أم شغال سواق عليها وبيكون مرتبه مثلاُ 400 جنيه لكنه اتعنتظ عشان ده منظره راكب بي أم ..

ووممكن يكون بتاع السايت أغني منه علي الاقل معاه الـ 14 الف الي جاب بيهم السياره ..

بس اسلوب كل منهما بيتكيف مع شكل ومظهر كل واحد منهم الخارجي ..

ولو شئت قول ان المظهر ده بيأثر علي الاخلاق كمان سواء بالسلب ..

او الايجاب

يعني ممكن بتاع العربيه الفلانيه الفارهه لو سواق ميكروباس رخم عليه

مش هينزل يتخانق معاه ويقوله يلا بينا علي القسم ...

ويلاحظ معنى كلامي الي يشوف سواقين الميكروباس ...

يكون نفس الشخص اشتغل سنتين علي تاكسي شاهين .. ( مثلا )

وبعد كده سابها واشتغل علي ميكروباس خط ( بولاق – إمبابة )

هتلاقي اسلوبه اتغير تماماً اسلوبه مع الزباين و العربيات الي حولايه اسلوب سواقته اسلوب كلامه مع الناس ومع اهله كمان ..

عايز اقول يعني ان في تأثيرات خارجيه بتقع علي الانسان بتأثر عليه تأثير مباشر ومن التأثيرات دي نظر الناس ليه ..

وانطباع الناس عنه من أول نظره .

عشان كده بتاع البدله ( حتى ولو هو فقير ) هتلاقيه عايش في دور رجال الاعمال وبيعدل الجرفته كده بغرور وممكن ميكنش في جيبه 15 جنيه علي بعض وكمان تليفونه مفهوش رصيد ..

نكمل لتوضيح الفكرة ..

صاحبنا كان عنده ساعه غاليه جداً عاملة بتاع 900 دولار مثلاً هتلاقيه وهو لابسها علي طول مبينها لما حد يقوله الساعه كام تلاقيه يروح مشمر كومه ويقوله بكبر كده ..

الساعه بتوقيت مصر خامسه وعشره

( علي اساس ان الساعه بتجيب توقيت كذا ودوله يعني ) .

. لكن سبحان الملك

صاحبنا ساعته اتكسرت منه ومش معاه ساعه دلوقتي ..

فلقي في البيت ساعه قديمه قال يلبسها لحد ما يشتري غير الي اتكسرت ..

ولما لبسها بيكون ماشي مسكوف تلاقيه يلبس تيشرت بكوم في الصيف عشان محدش يشوفها تلاقيه لو حد سأله الساعه كم ؟

تلاقيه يقف علي جنب بعيد عن السائل ويبص في الساعه وبعد كده يرجع ويقوله ..

او حد يسأله الساعه كم تلاقيه يقوله مش معايه ساعه ..

الموضوع ملهوش علاقه بالفقر او الغنى كلامي كله عن المظهر الخارجي للانسان وإن كان مؤقت فهو يؤثر تأثير مباشر علي الانسان سواء في اسلوبه او كلامه أو أخلاقه ..

والمظهر الخارجي مش بس بيأثر علي الشخص نفسه لاء ده ليه إنطباع وتأثير ..

فالانطباع بيكون عند الناس .. يقولك بص فلان ده غني او فلان ده شيك او فلان ده محترم أو فلان ده كويس

.. وبالنسبه للتأثير فهو يؤثر علي الانسان نفسه ..

فعندما ينظر الناس له نظرة الاحترام تجده يعيش في هذا الوضع ويعيش في هذا الدور فتجده يتعامل فعلاً بأدب جم ولو لم يكن معتاد علي هذا الوضع ..

يعني مثلاً لو عرف انه اتقال عليه من جاره الي قدامه قاله ده الاخ فلان ده وشه بشوش ..

ومثلاً انت مش كده ..

فهتلاقي نفسك نازل من بيتكم مثلاً وعندك مشاكل قد كده

وقابلت جارك ده في المدخل ..

هتسلم عليه وهتخلي وشك بشوش جداً ..

طيب ليه انت عملت كده ؟ هل ده نفاق ؟

لاء مش نفاق لان البشاشه صفه طيبه هو وصفك بيها وانت حبيت ان متتغيرش فكرته عنك ..

طيب لو عرفت ان جيرانك كلهم وصفوك بنفس الوصف .. يبقي لما هتقابل أي واحد منهم .. هتكون بشوش ..

وعلي العكس انطباع الناس لما يكون سلبي هتلاقيه بردو بيأثر علي الشخص ..

يعني اتعرف في المنطقه مثلاً ان الواد زيزو مثلا ..

مفيش بنت بتعدي في الشارع غير لما لازم يعاكسها و... إلخ

طيب في يوم هو واقف مع اصحابه وملوش نفس يعاكس

وعدت بنت وهو مش عايز يعاكسها ..

ويلاقي اصحابه بيبصوا ليه هو كده منتظرين يعاكسها ..

فيقوم يعاكسها لانه اشتهر بكده ..

ولو معاكسهاش هيتقال انه معرفش يعلقها او خاف من اخوها مثلاً

فشهرته بقلة الادب دي أجبرته ولو مش على مزاجه انه يعمل كده ..

ولو بلطجي اتعرف عنه انه مفيش حد يقدر يتبلطج وهو موجود ..

يعني هو راجل الشارع يعني أبو دراع بتاع المنطقه ..

طيب النهارده في خناقه في الشارع بس هو مش عايز يتخانق ..

مينفعش ميتخانقش وميسبش الدين وميبهدلش فلان ..

حتى لو مش مزاجه بس هو اشتهر بكده ومينفعش يسكت

لانه لو سكت هيتقال انه خاف من فلان او انه قلق منه ..

--------------

كل ده انا عايز اقرب ليكم فكرة ان الانسان مظهره الخارجي او شخصيته سواء مؤقته أو دائمه أو

( حد وصفه او حتى أدعى زي الي قال بشوش )

او انطباع الناس ككل سواء الإيجاب او السلب

كل ده ليه تأثير وليه انطباع ..

فبيأثر علي الشخصيه نفسها انه بيتكيف مع ما اتصف بيه او مع الانطباع الناس الي إتاخد عنه ...

ماذا أريد من هذا هذا الموضوع الطويل العريض !

الامر وما فيه إن اظهار وإخفاء الهوية له تأثير كبير

ففي الإسلام أمور كثيرة أعتمدت علي المظهر الخارجي ..

نتحدث عنها مع بعضنا في موضوعات قادمة بإذن الله بشيء من التفصيل واليكم الموجز ..

ففي الحج مثلاً في سنة أمر بها النبي في لبس الإحرام اسمها الإضباع وهي أظهار كتف وتغطية الآخر وده كان من أسبابة إظهار لغير المسلمين قوة المسلمين .

الحجاب مثلاً عبادة وفرض طبعاً ومفيش حد عاقل مختلف علي كده ..

بعيداً عن موضوع الهشوة والفتنة أو غيره وبعيداً عن شروط الحجاب

هتكلم من ناحية تانيه

البنت الي لابسه لبس صح والبنت الي لابسه لبس مش كويس

أكيد لكل لبس منهما

( الصح أو الغلط )

أكيد لكل منهما إنطباع ولكل منهما تأثير علي شخصية صاحبته

يعني تجد غض البصر والحياء والصوت المنخفض وغيره في الشارع عند البنت الي لابسه كويس أما الأخرى فهي لما تسمع المعاكسات والمضايقات ده شيء بيفرحها

.ويؤثر عليها هذا بإنها تضحك لده وتتنازل مع ده وتتصاحب علي ده وتخرج مع ده ..

وطبعاً غض بصر إيه الي انت جي تقول عليه !!!

فشوفت سبحان الله البنت لما تظهر انها بنت كويس عن طريق اسلوبها ولبسها

ده بيضيف عندها اشياء وبقدر ما ارتقت في لبسها الظاهر واخلاقها الظاهرة

زادت عبادات تفتقدها إلي الان

ولو البنت مثلاً مش محجبه ولبست حجابها او محجبه حجاب نص نص ولبسها ضيق وراحت ظبطته شويه او بقت تلبس لبس واسع مش ضيق ..

كل التغيرات دي اكيد بتغير من شخصية الانسان

بقول كده عشان ممكن البنت تقول انا مش متخيله نفسي وانا باللبس الفلاني .. شكلي هيبقى وحش .. او مش متخيله شخصيتها دلوقتي بتهريجها مع الولاد او اي غلط تاني

هي فاهمه انا مش هتقدر تتغير ؟!

مين قالك

تعامل الناس معاكي وردود فعلهم هتختلف

اسلوبك انتي مع الناس هيختلف ..

لان مظهرك هيأثر عليكي أكيد

حتى ولو تعبتي في الاول بس في نتيجه أكيد بتكون كويسه ..

وكمان لما بعمل اي تقرب الي الله

ربنا مش بيتركني ( لاء )

ده ربنا كمان بيقرب مني زي ما انا بقرب منه

وقال :

من تقرب إلي شبراً تقربت إليه زراعاً !!

--------------------

وكذلك الأخ لما يرفع شعار الإيمان الظاهر حتى وإن كان شخصيته ينقصها كذا وكذا وهو اصلاً ليس كذا وكذا .. لكن زي ما عرفنا الشيء لما يكون كويس .. هياثر بإيجابيه علي صاحبه وهيعطي إنطباع عند الناس طيب لهذا الشخص الطيب ..

يعني لو واحد مثلاً بيشرب سجاير ولكنه بيصلي

الشاب ده لو بدء يصلي في المسجد ويتعرف علي ناس كويسه

بالتدريج هيقلل سجاير وممكن يبطلها لانه اتعرف عنه انه بقا انسان كويس وبيصلي

ومع الوقت هتزيد صحبته الصالحة
ولازم يعيش معاهم في نفس الجو ونفس المود

وكأنها نوع من انواع التربية الإيمانية ونوع من انواع جهاد النفس لكن مش لوحدك معاك وقتها صحبه صالحه ..

كل الي عايز اقوله من موضوعنا الطووووويل ده ..

ان موضوع المظهر الخارجي ده بيأثر تأثير شديد علي الانسان واخلاقه وانطباعه وكل حياته ..

وان شاء الله ده مش نفاق .. لو فعلاً هيغير في شخصيتي .. وطالما انا بتحسن بجد ..

النفاق اني اكون بمثل اني متدين

وانا كاره التدين وبتظاهر بالدين لبعض المصالح لكني مُصر علي عدم الالتزام ..

لكن طالما بحسن من نفسي .. وكمان من جوايه بحاول اتغير واكون أحسن وبتطلب الإعانة من الله

لكن لو انت مش حابب اصلاً انك تقرب من ربنا وبتعمل كده عشان بس الناس تقول ,

يبقى غلط

لكن انت بتحاول تعمل كده عشان يكون سبيل ليك في انك تصلح نفسك ..

كده متكنش نفاق ..

وفيه كتاب اسمه ( الإخلاص )

للدكتور سيد حسين العفاني .

قال في اول الكتاب

لو انا مثلاً

كنت لوحدي ولقيت ناس ( متدينين )

( روحت أظهرت ليهم اني كويس وبعمل خير )

وأظهرت لهم ده عشان اخليهم يحبوني لانهم كويسين وانا نفسي اني اقرب منهم ..

قال ان ده مش رياء .

في نهاية الموضوع الرخم : )

احب اقولكم ان اهو رمضان داخل علينا

ويعتبر فرصه كويسه لينا عشان نبدء

وكل الناس بتعمل خير

واحنا كمان تعالوا ننزل نصلي التراويح ونتعرف علي ناس كويسين

تعالوا نقعد في المسجد ونعيش في دور الناس كويسين حتى لو احنا مليانين بلاوي ومشاكل وبنعمل كل حاجه حرام ..

لكن متحرمش نفسك انك تكون كويس

رمضان معانا دلوقتي تعالوا نبقى كويسين

إيه رأيك تعيش في دور

المسكين ؟

المسكين الفقير لله

ويكون مسجد محدش يعرفك فيه

تعرف تروح وتقعد جنب العمود

وعيش في دور المسكين قدام ربنا ..

وصدقني ... هتفرق معاك

حتى جربها في البيت

جرب وقولي ..

أسئل الله ان يكتب لنا الهداية والايمان وحسن الخلق ..

وجزاكم الله خيراً

الموضوع : يا عم كلنا لازم نعيش في الدووووووور المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

عضو جديد عدد المساهمات : 90

هههههههههههههه
كلامك كله صح

لازم الواحد يعييش في الدور

ربنا يوفقك يا شيسي

الموضوع : يا عم كلنا لازم نعيش في الدووووووور المصدر : مسجد الهدي المحمدي الكاتب: الروش مان
توقيع العضو/ه :الروش مان

يا عم كلنا لازم نعيش في الدووووووور

يا عم كلنا لازم نعيش في الدووووووور

مواضيع مماثلة

مواضيع مماثلة