تقول احد الأخوات

زى دلوقتى من كام سنة وقبل رمضان كنت مضايقة ومخنوقة من نفسى
نفسى اتغير صحيح أنا كنت ملتزمة لحد ما طرحة طويلة وبطلت اسمع اغاني واشوف تلفزيون وبدأت احفظ قرآن

لكن كنت حسه إنى بقالى كثير واقفة مكانى
اقعد كثير متفرجش على التلفزيون وبعدين اضعف مرة واتفرج
اقعد كثير مسمعش اغانى وبعدين القيها شغالة اردد معاها
بصلى الفجر لكن بتيجي ايام مسمعش المنبه والمشكله لما تبقى ايام ورا بعض والاقى انى فى اسبوع واحد ضاع منى الفجر 4 مرات مثلا!
يجى فرح مع انى مبحضرش اضعف واحضر
وارجع تانى اندم وهكذا

جيت قبل رمضان وكنت خلاص مش عاوزة استمر كده
عاوزه اتنقل مرحله تانيه
كنت اقرى عن السلف فاتعجب من ثباتهم !

أنا عارفة إنى برده هذنب لإنى بشر لكن كان نفسى ذنوبى تتغير
نفسى اعلى درجة
ذنوبى تبقى أقل

وكن متعودة كل سنة من ساعة ما التزمت احدد قبل رمضان اهدافى
وحددت الهدف أنا مش عايزه افضل كده
ودعيت كثير جدا
كانت دعوتى يوميا على الفطار وفى السجود وفى السحر
أنا مكنتش عارفة أنا هتغير إزاى
بس دعيت بيقين

وسبحان المجيب
ربنا أنعم عليا بهدية مكنتش فى بالى وقتها ولا كنت بفكر فيها ولا كنت اعتقد إن الحاجة دي هى الى كنت بتدعيلها

الهدية كانت النقاب وأنا وقتها كان بعيد جدا عن تفكيرى
أيات قرآن ، ناس أقبلها ، حاجات اقراها
تقريبا قعدت يومين كل حاجة بسمعها أو اقرها بتدفعنى اخد القرار

وقتها عرفت انها رسالة من ربنا
كنت خايفة مثبتش

صليت لربنا يثبتنى و فاتحت أهلى
فى الأول رفض شديد وبعدين حصل موقف معين شغلهم ووافقوا

ولبست النقاب في نص رمضان
وقضيت النص التانى منتقبه

لكن مكنتش دى بس الهدية الوحيدة

بعدها كان معادى مع الهدية التانيه كتاب جميل للشيخ يعقوب عن رمضان
وكان فيه جزء عن الاعتكاف

لكن كان العشرة خلاص فى اواخرهم فاعتكفت لاول مره فى حياتى
اخر يومين من رمضان
وكان احساااااس تانى ميتوصفش

خلص رمضان

لكن الهدايا والمنن مستمرة

مكنش ليا أى علاقة بالدعوة على النت

ولكن بفضل الله
ربنا فتح لى باب للدعوه والعجيب انى نجحت فيه بفضله وكرمه
وفتح لى باب تانى من صنائع المعروف

مش بس كده
لا والأهم كل الذنوب الى كنت متضايقه منها راحت بلا رجعهه
من ساعتها بفضل الله انتهت

وفعلا ربنا استجاب دعائى وبعدت عن الدايرة المقفوله الى كنت بلف فيها

حبيت اقولكم القصة قبل رمضان

عشان كل واحد يحدد هو عاوز ايه ويدعى بيقين وقبل ما ينتهى رمضان بإذن الله هيشوف الإجابة قدامه

وادعولى كثير رمضان السنة دى يكون نقلة تانيه

نفسى ربنا يتوب عليا من تضيع الوقت ومن قله الخشوع
نفسى يرزقنى علو الهمه واكون من القوامين الصوامين التالين لكتابه الداعين لدينه على الوجه الذى يرضيه


اللهم بلغنا رمضان
فقد اشتد شوقنا اليه