انا كده كويس

10/08/2009

انا كده كويس

مين اللى بيقولها

والد مثلا يقول لابنه انت ما بتذاكرش ليه
ركز عشان ما يتكررش اللى حصل السنه اللى فاتت
يقوله انا كده كويس
يا والدى دا انا معايا واحد اترفد من كتر السقوط

و واحد تانى بياخد السنه فى تلت سنين
وواحد معدى التلاتين سنه ولسه فى الجامعه
طيب ليه بتبص للفاشلين ليه ما بتقارنش نفسك بالناجحين ؟

نوع تانى

يقولك انا كده كويس انا مثلا بقعد مع صحابى على القهوه
بس ما بشربش دخان وبمشى معاهم بس ما عاكسش
اهو ده بيلعب بالنار رايح جنب النار ويقولك مش هتلسع

نوع تالت

يقولك انا حياتى كلها لدراستى انا حياتى كلها لاسرتى او لشغلى
وما بعملش حاجه غلط بس ما بتعملش حاجه صح

نوع رابع

يقولك انا توبت عن معاصى كتير وما كانش بيصلى بقى بيصلى فبص قام قايل ايه
انا كنت فين وبقيت فين انا الحمدلله
انا كده بقيت كويس

انت كنت فين وبقيت فين ليه بتقيسها كده؟

طيب ما بلاش تقيس انت قطعت قد ايه من الطريق
قيس انت باقيلك قد ايه
على ما توصل لنهاية الطريق

دى مشكلة غالبيتنا مشكلة اللى مش عايز يتقدم ووقف عند خط معين

والمشكله ناس بتقول الكلمه دى كتير

يا جماعه

ده لسه فينا ناس بتصلى الفجر لما الشمس تطلع
وناس بتظبط المنبه على ميعاد المحاضره والجامعه وما بتظبطوش على ميعاد آذان الفجر
وناس بتأخر الصلاه وناس بتسرح فى الصلاه
فكلمة انا كده كويس دى مرض او فيروس ودلالتها خطيره

و من ضمن دلالتها نقص الخوف من الله

فاللى بيقول انا كده كويس مش خايف من الله هو لما حد يصلى الفجر بعد طلوع الشمس هو انك تجمع صلاتين
هو انك تتعود انك تأخر الصلاه او تصلى فى بيتك
او فى الجامع خمس دقايق خطف الركعتين وخلص
وتلت تربع الصلاه سرحان فى الدنيا

وقبل الصلاه كان بيعمل معصيه ويخرج من الصلاه يعمل معصيه

طب وبعدين بتتكبر على الله بهذه الصلاه بتتكبر على الله بهذه النقرات

وفى نفس الوقت ممكن يخرج من البيت وهو بيشوح لابـوه وامـه فى خناقه

ويخرج اول ما يقابل اصحابه التحيه بتاعتهم السباب بالوالدين مش فى شباب كتير كده

وفوق كل ده ممكن يقعد يشتم فى اهله ده ابويا عمل فيا وامى عملت فيا

يعنى تلت كبائر كبيرة التشويح اكتر من ولا تقل لهما اف
وكبيرة سب الوالدين بإنه عرض والده ووالدته للسباب
كلنا عارفين حديث كيف يسب الرجل والديه
والكبيره التالته اغتاب والديه

يبقى قضية انا كده كويس بتقودنا لمعنى احتقار السيئات

انا كده كويس دى معنى بعيد جدا عن مراد الله
الذنوب بتاعتنا مثلا

فى واحد حالا دلوقتى فى الدقيقه دى ممكن يكون بيشرب سيجاره يكون انت السبب فى انك شربته سجاير

فى واحده ممكن تكون بتكلم واحد فى التليفون او الموبايل وتكونى انتى اللى عرفتيها عليه
او واحده بتسمع شريط اغانى ممكن تكونى انتى اللى دلتيها عليه

و فى نفس الوقت ممكن يكون واحد بيصلى انت كنت سبب فى هدايته
او بيسمع شريط دينى انت اللى دليته عليه

فمش عايزين نتصدم فى الدنيا وفى القبر بعد كده

والناس اللى مش خايفه من الموت وكأنها هتخلد فى الدنيا

شوف وتابع قول سبحانه وتعالى وهو يقول
(أَفَرَأَيْتَ إِن مَّتَّعْنَاهُمْ سِنِينَ{205}
ثُمَّ جَاءهُم مَّا كَانُوا يُوعَدُونَ{206}
مَا أَغْنَى عَنْهُم مَّا كَانُوا يُمَتَّعُونَ{207} ) الشعراء
عيش ميت سنه بالطول والعرض والموت هييجى هييجى والحساب هييجى هييجى

وكل اللى عملته من ذنوب وكل حرمات انتهكتها هتغنى عنك ايه

تانى علامه من علامات انا كده كويس عدم حب الله

اصل معنى الكلمه دى يا جماعه ان اللى بيقولها كأنه بيقول لربنا كفايه عليك كده يارب حاشا لله طبعا

طيب ازاى اعرف انى بحب الله
الموقف الاول
لما تيجى تنام دايما لما بتيجى تنام بتفكر فى اكتر حاجه انت بتحبها
فتلاقى لو واحد مثلا وآسف لاختيار المثال
لو واحد بيحب واحده تلاقيه لما ييجى ينام عمال يفكر فيها
ويفضل صاحى لتانى يوم وهو بيفكر فيها لحد ما والدته تيجى تصحيه وهو ما نامش اصلا
لكن لو انت بتحب ربنا اخر حاجه وانت بتنام هتفكر فيها ربنا سبحانه وتعالى
تانى حاجه ساعة اليقظه اللى بيحب حد اول ما ترد اليه روحه هيكون اول ذكره بلسانه للى بيحبه
تانى موقف
واللى يتفضح قدام نفسه يتفضح واللى يتشرف قدام نفسه وامام الله يتشرف
تالت موقف
فى الصلاه لما بتقابل محبوبك وتقف بين ايدين ربنا
ففى ناس شعارها ارحنا منها وناس شعارها ارحنا بها
فى ناس لما بتدخل فى الصلاه حامله هم ان الصلاه هتخلص وناس حامله هم ان الصلاه تخلص
والنبى صلى الله عليه وسلم حدثنا عن انتظار الصلاه بعد الصلاه
فهتلاقى اللى بيحب حاجه بيستناها
فاللى بيحب الافــلام بيستنى الفيلم بعد الفيلم واللى بيحب الكوره بيستنى المباراه بعد المباره
واللى بيحب ربنا هيستنى الصلاه بعد الصلاه
رابع حاجه
عند الشدائد لان دايما عند الشدائد اول حاجه الواحد بيفتكرها اللى بيحبه
فمثلا تلاقى ليك صاحب اوليكى صاحبه اول ما تحزن او تفرح تجرى عليه هو
وفى ناس اول حاجه تجرى عليها ربنا

فكلمة انا كده كويس ده خلل فى علاقتك مع الله
خلل فى حبك لله وخلل فى تعظيم الله سبحانه وتعالى

هي مشكلة ابليس كانت ايه
ابليس ربنا امره بأمر فنظر للأمر وما نظرش للآمر
فقال اسجد ازاى وانا من نار وهو من طين
فاللى بينظر للآمر هيعظم اقل امر من اوامره وهيعظم اقل نهى من نواهيه
اى حد فينا هيستشعر عظمة ربنا فى قلبه يبقى بالتبعيه هيعظم اى امر من اوامره

فلما ربنا يقولنا ده امر يبقى ننفذه مهما كان صعب
لو انا راجل تاجر وعندى تجاره او دكتور وعندى عياده او مهندس وعندى شركه
ولو بكسب 1000 جنيه حتى فى النص ساعه

يبقى المفروض والصح ايه اول ما الآذان يقول الله أكبر يبقى الله أكبر من كل شىء

يبقى اقفل شركتى اواسيب شغلى واروح اصلى فى الجامع
طيب امتى هنعمل كده لما نستشعر عظمة ربنا فى قلوبنا
ولما ربنا ينهينا عن شىء يبقى على طول لازم ابعد عنه مهما كانت شهوتى للشىء ده

لو استشعرنا عظمة الله لا يمكن هنبص لحاجه ربنا حرم علينا اننا نبصلها

ولا يمكن نسمع حاجه ربنا حرم علينا اننا نسمعها ولا يمكن نتكلم بكلام ربنا حرم علينا اننا نقوله
إنه الله جلا جلاله هو الذى القلوب هائمة فى محبته والعقول حائرة فى عظمته والجوارح منقاده فى طاعته
انت لما بتعمل ذنب بيكون لسبب من تلاته
لاما بتحب الذنب ومش قادر تسيبه
لاما بتعظم الذنب وتقول ده هو اللى عاملى برستيجى ومدينى هيبه بين الناس

لاما بتعمله خوف زى مثلا

لو شغال مدير الشركه قالك روح ادفع رشوه ولا حاجه تقوم انت قايل لو انا عصيته يرفدنى من الشغل
طيب لو انت بتحب الذنب يبقى حبك لله لازم يكون اشد
ولو انت بتعظم الذنب يبقى لازم تعظيمك لله يكون اشد
ولو انت بتخاف من الذنب يبقى خوفك من الله لازم يبقى اشد

و من الدلالات لكلمة انا كده كويس مشكلة عدم الفهم
اصل ربنا مش طالب اننا نسيب المعاصى بس
واللى فاكر ان العمليه ترك المعاصى بس يبقى كده هو مش فاهم
كمان فى طاعات مطلوبه مننا لازم نعملها
فاللى بيسال فينا فى بعض الاحيان ويقول ده فرض ولا سنه
بلاش السؤال كده خلى السؤال هو ده يقربنا من الجنه ولا لاء
الموظف لما بتقوله فى شغل اضافى بمرتب اضافى وعلاوات هيفرح بالشغل الاضافى
اهى السنن دى هى الشغل الاضافى
وحديث بلال رضى الله عنه لما النبى قال له انى سمعت خشخشت نعليك بين يدى فى الجنه
ليه لان بلال كان بيصلى ركعتين بعد كل وضوء
طيب ما بلال هو اللى استحمل الاذى وهو اللى كان بيأذن كل صلاه
اشمعنى العمل ده اللى دخل بيه الجنه برغم ان الاعمال التانيه اعظم
ما تعرفشى ايه العمل اللى هيتقبل منك وايه العمل اللى هتدخل بيه الجنه برحمة ربنا

لازم يكون ده فكرنا

فإنك لا تدري بماذا يغفر لك ؟ وماذا يقبل منك ؟
ولازم نعرف فى النهايه مهما عملنا لن نوفى الله حقه علينا

فبلاش كلمة أنا كده كويس أنا كده أحسن من غيرى
وبداية كل خير كثيرا ما تكون في الاعتراف بالقصور والتقصير والسعي نحو الافضل على قدر المستطاع

الموضوع : انا كده كويس المصدر : مسجد الهدي المحمدي الكاتب: أحلى حياة
توقيع العضو/ه :أحلى حياة

عضو جديد عدد المساهمات : 684

الموضوع : انا كده كويس المصدر : مسجد الهدي المحمدي الكاتب: زهرة المدائن
توقيع العضو/ه :زهرة المدائن

انا كده كويس

انا كده كويس

مواضيع مماثلة

مواضيع مماثلة